DILI (TOP) – Prezidente Partidu Demokrátiku (PD), Mariano Asanami Sabino hateten, bainhira ko’alia kona-ba Estadu, PD sempre prontu atu serbisu hamutuk ho partidu se de’it, tanba partidu joven ne’e mai ho lema "Ba O Timor, Maubere Oan Prontu Serbi”.
Lema PD nian ne’e hatudu tiha ona liu husi koaligasaun ho partidu CNRT no partidu sira seluk desde tinan 2007 to’o 2012 hodi ukun no dezenvolve rai ne’e, tui fali hamutuk tan dala ida ho partidu FRETILIN hodi forma governu minoritaria ne’ebé ikus mai tenke monu namtate iha dalan klaran, nune’e hakat ba eleisaun antisipada iha tinan 2018.
Iha eleisaun prezidensial ronde dahuluk liuba, Partidu Demokrátiku (PD) iha nia kandidatu rasik ho intensaun atu sukat sira nia baze politika iha baze ne’e aumenta ka la’e, no ba fali eleisaun prezidensial ronde daruak, partidu joven ne’e desidi apoiu fali José Ramós-Horta, maibé oras ne’e lideransa PD nian deklara durante nia diskursu kongresu nasionál partidu FRETILIN ba dalimak iha CCD katak, la’os atu sai “kabidi” no “ai-tonka” ba FRETILIN iha tinan 2023, maibé tuir loloos Asanami katak, bainhira ko’alia kona-ba Estadu, PD ne’e laiha rezerva. Ida ne’e signifika, se eleisaun parlamentar iha tinan 2023 mak povu depozita sira nia konfiansa ba FRETILIN maibé, la hetan maioria, PD kontinua prontu “hamutuk nafatin ho FRETILIN” hodi “hakruk no kumpri” ba filosofia bainhira ko’alia kona-ba Estadu, PD laiha rezerva. Hanesan mós partidu politika seluk mak hetan vitoria iha eleisaun parlamentar 2023 maibé, la maioria, PD prontu nafatin hodi hamutuk ho partidu vensedor.
“Maubere-oan sempre iha FRETILIN nia sorin iha tempu ne’ebé difisil. Tanba ne’e, maske la tama ba ukun ka la hamutuk iha ukun, maibé sura nafatin ho PD bainhira kuandu ko’alia kona-ba Estadu. Iha PD laiha rezerva ba Estadu. Bainhira povu ne’e presiza ita fó. La signifika katak, ba tenke tuur hanesan ministru ka deputadu,” hateten Prezidente PD, Mariano Asanami Sabino durante nia diskursu iha kongresu nasionál ba dalimak partidu FRETILIN nian iha CCD, Kinta 8 Setembru 2022.
“Iha ne’ebé de’it, to’os nain ka dasa-rai ka iha ne’ebé kuandu PD-oan sira iha ne’eba ne’e uma-foun ida ne’ebé mak ami harii maibé, hodi sasan uma-tuan rai hela iha ne’eba. Tanba prinsipiu ho ideia FRETILIN nian lubuk ida mós iha PD laran,” Asanami afirma.
Assanami fó hanoin hodi husu ba partisipante ka kongresista sira tenki vota ho konsiensia hodi nafatin hanoin katak ema lubuk boot ninia esperansa tula ba iha kabas no bainhira lider eleitu tenki ukun ka'er metin nafatin prinsipiu partidu FRETILIN hodi lori moris di'ak ba povu la'os ba aan rasik.
“Tanba ne'e, ho hakaraik aan husu ba kongresista sira, ita boot sira hotu sai esperansa ba ema lubuk ida iha li'ur, diferensia idea tenki tau hamutuk diskute hodi hetan rezultadu ne’ebé di'ak, se de'it mak ka'er estrutura (eleitu) prinsipiu FRETILIN nian tenki tau nafatin iha oin," nia hateten.
Assanami nafatin espresa ninia sentimentu, partidu demokrátiku prontu kontribui tanba ba rai no povu nunka kolen atu kontribui liuliu hamutuk ho partidu boot sira.
"Ukun ka la ukun maibé kontribui nafatin ninia idea no hakarak, saida mak tenki halo ba povu ida ne'e PD la kolen atu fo hatene nafatin, liuliu ba partidu boot hanesan FRETILIN ho partidu CNRT. Partidu rua ne’ebé iha responsabilidade boot ba rai no povu," Assanami promete.
Nasaun doben ne'e tenki di'ak liu hanesan lia-fuan sira ne’ebé iha tempu luta hakarak lori moris di'ak no hakarak povu sente rai ida ne'e nian hodi sai patraun ba nia rain rasik.
Iha ambitu ne'e Assanami mós hato'o istoria uitoan kona-ba ninia privadu iha tempu luta ba libertasaun nasionál.
"Iha momentu rezistensia situasaun ne’ebé difisil jornalista ida entrevista ha'u dehan hanesan ne'e "militar Indonezia barak hanesan povu Timor Lorosa'e, imi bele ukun aan ka la'e", ha'u resposta badak de'it ba nia katak "ukun aan ne'e hanesan fiar ida". Ami moris luta ba ukun aan ami mate mós nafatin husu ba Nai Maromak atu ami nia klamar luta nafatin ba ukun rasik aan "isin Maubere klamar mós Maubere."
Ikus ho hakaraik aan Assanami nafatin husu ba partisipante kongresu sira rezultadu eleisaun saida de'it importante nafatin valoriza eroi ba patria no hako'ak nafatin lider nasional sira hodi luta ba povu nia moris di'ak.
"Sai Frentista ne’ebé la haree de'it partidu maibé Frentista ne’ebé ka'er Timoroan hotu-hotu atu bele ba oin, hodi ema hotu sente katak ne'e ha'u nia rain, partidu iha ka la iha partidu, maibé Timor ha'u nia rain, hodi fila fali ba antigu (tempu luta) Frente Revolusionariu ne’ebé lori esperansa ba povu tomak."
Retifikasaun:
Notisia The Oe-Kusi Post (TOP) ho titulu PD prontu sai “kabidi” no “ai-tonka” ba FRETILIN iha 2023 ne’e laloos. Tuir loloos mak: Maubere-oan sempre iha FRETILIN nia sorin iha tempu difisil.
Ba sala ne’e, redasaun hadia ona, no husu deskulpa ba le’e nain sira hotu.
Redasaun
