DILI (TOP) – Lider Karismatiku Kay Rala Xanana Gusmão husu ba membru arte marsiais hotu tenke kontribui ba paz no estabilidade iha rai-laran.
Xanana husu ba sidadaun hotu ne’ebé involve no la involve aan iha grupu arte marsiais sira tenke kuda-metin espiritu sidadania, nune'e bele iha hanoin katak, rai ne'e presiza atu defende la'os para atu destroi hodi prejudika ema hotu ninia direitu hakarak moris livre no armonia.
"Ha'u halo apelu bo'ot tebes-tebes ida ba joven sira atu sente katak Timoroan hotu-hotu iha dever obrigasaun boot ida nu'udar sidadaun, sidadaun ne’ebé di'ak no respeita malu hahu hosi sira nia uma laran rasik to'o iha vizinu no komunidade nia laran hamosu no hametin armonia iha sosiedade," Xanana hateten ba jornalista sira hafoin fila husi Vatikanu nu'udar enviadu espesial xefe estadu ba partisipa seremonia investidura Don Virgilio do Carmo da Silva SDB ba Kardeal, iha aeroportu internasional Nicolau Lobato Komoro-Dili, Sesta 9 Setembru 2022.
"Ha'u rona triste tebes-tebes, joven sira lakon tiha espiritu sidadania, joven sira tenki tau iha ulun dever boot ida hodi sai sidadaun di'ak ba rai ida ne'e. Ha'u husu ba joven sira labele haluha katak imi nia aman no tiun karik terus tebes mate tanba inimigu oho, terus hamalaha to'o mate, hotu-hotu atu hetan ukun aan ne'e atu entrega ba imi. Sira entrega tiha ona rai ida furak, no rai ida livre ba imi, maibé agora imi hakarak estraga fali ne’e la di’ak," Xanana hato’o nia apelu ne’e.
Prezidente partidu CNRT, Kay Rala Xanana Gusmão simu husi nia Sekretariu Jeral, Dato Sri Francisco Kalbuadi Lay hafoin fila husi Vatikanu, Sesta 9 Setembru 2022. Foto TOP/Raimundos Oki.
Nia hatutan, jerasaun tuan, katuas-ferik sira lakon hotu ona, iha tinan 23 husi 1999 mai to'o agora la'os mate ho riku, maibé mate ho prinsipiu maski terus nafatin mas ho sentidu kontente ida katak entrega hela rai ne'e ba sira nia oan sira hodi kontinua defende para labele monu ba ema aat sira ninia liman.
Lider libertador ne'e nafatin fó hanoin ba joven sira ne’ebé semana hirak ne'e nia laran sempre kria ambiente paniku hodi prejudika ema hotu ninia direitu hakarak moris livre no dame.
"Tanba ne'e duni bainhira imi lakon tiha espiritu sidadania ita sente katak rai ne'e loron ruma bainhira imi mak boot hotu ona iha rai ida ne'e, imi la hatene ona eduka imi nia oan sira, tanba imi nia ezemplu hatudu daudaun fahe no baku malu to'o oho malu, ne'e ezemplu la di'ak ida," Xanana esplika.
Antes termina, Xanana dala ida tan ho domin tomak halo apela ba jerasaun foun sira hadomi no respeita malu nafatin hodi bele dezenvolve rai ne'e ba futuru ne’ebé di'ak liu.
"Ha'u halo apelu boot ida ba joven sira hadomi no fo liman ba malu, kria armonia ho dame iha rai laran hahu husi uma laran, viziñu, komunidade hodi ita hotu bele fiar katak hamutuk ita sei lori rai ne'e ba oin ho di'ak."
Author:Raimundos OkiWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
