DILI (TOP) – Rekomenda malu atu konkore ba vaga serbisu iha Eletrsidade Timor-Leste, Empreza Públiku (EDTL, E.P) sai kontradiz tebes ho moto Partidu Libertasaun Popular (PLP) nian ne’ebé dehan Hisik Kosar ba Moris Di’ak liu husi riku fahe hanesan, no oportunidade mós fahe hanesan, tanba vaga serbisu ne’e ba sidadaun hotu, la’os ba belun sira iha PLP de’it.
Maibé, iha parte ida atu kumpri de’it moto PLP nian katak fahe oportunidade hanesan, tuir reportazen Hatutan.com nian katak, diresaun Partidu Libertasaun Popular (PLP) munisipiu Lautem halo karta rekomendasaun ba Prezidente Eletrisidade Timor Leste, Empreza Públiku (EDTL,E.P), Paulo da Silva, atu toma konsiderasaun ba membru estrutura PLP sira ne’ebé aplika ba vaga rekrutamentu pesoál tékniku EDTL,E.P Munisípiu Lautem nian.
Karta ho asuntu Rekomendasaun Militante PLP Aplika Vaga EDTL,E.P Munisípiu Lautem, 12 fulan-Agustu 2022, ne’ebé asina husi Komisáriu Polítika PLP Nasional, Constantino Escoliano Brandão ho Carsiliano Oliveira, koordenadór PLP Munisípiu Lautem, sai viral tiha iha plata forma media sosial (Facebook).
Dokumentu rekomendasaun ne’e, hatudu diresaun sira iha PLP nian rekomenda sira-nia militante no estrutura juventude PLP Lautem nian atu bele toma konsiderasaun iha vaga ne’ebé publika husi EDTL, E.P iha loron 20 fulan-Jullu 2022.
Bazeia bá informasaun ne’ebé viral iha media sosial Facebook ne’e, Segunda (05/09/2022), Hatutan.com tenta ona halo konfirmasaun ho Prezidente EDTL, EP, Paulo da Silva, iha ninia kna’ar fatin iha Edifisiu Sentral EDTL,E.P iha Caicoli, Dili.
Infelizmente, pesoal funsionária ida ne’ebé halo atendimentu relasaun públiku nian iha Gabinete Prezidente EDTL,E.P husu atu jornalista Hatutan.com, halo uluk karta ofisial ida ka pedidu ba entrevista nian no dirije bá prezidente EDTL.EP, no bainhira iha ona despaxu maka, foin iha autorizasaun ba entrevista.
Vise-Prezidente Partidu Libertasaun Populár (PLP), Abrão José Freitas “Mate-Restu” via telefónika hodi rejeita informasaun ida-ne’e, tanba nia rasik laiha koñesimentu bá karta rekomendasaun ne’e.
“Ha’u la asina dokumentu ida ne’e, koordenadór sira mak halo buat ne’e karik. Sira parese, asuntu ne’e ha’u seidauk hatene di’ak, ha’u hanoin hela para atu bolu prezidente, koordenadór PLP Lautem nian. Sé mak fó orientasaun bá nia halo buat ida ne’e,” Mate-Restu esplika ne’ebé The Oe-Kusi Post (TOP) asesu husi Hatutan.com.
Tuir Mate-Restu, konkursu públiku ne’ebé EDTL.E.P loke ne’e nakloke bá ema timoroan hotu, no ida ne’e la’ós asuntu sira mak liga desizaun polítika nian ka partidu nia desizaun.
“Mais ida ne’e liga ho funsaun de funsionalizmu públiku ninian, ne’e nakloke, lei vigór hela. Ne’ebé, ha’u halo ona xamada bá koordenadór, para parese loron rua ka tolu ne’e, ha’u hakarak ko’alia ho nia, tanba saida mak nia halo ida ne’e,” Mate-Restu hateten.
Maske karta rekomendasaun ne’e, iha mós koñesimentu husi Vise prezidente PLP, maibé “Mate-Restu” nafatin rejeita, tanba la’ós nia mak halo karta rekomendasaun ne’e.
“Lae, lae, ha’u la asina karta ida kona-bá ida ne’e. Parese sira mensiona ha’u nia naran ruma iha ne’ebá. Mais ha’u la asina dokumentu sira hanesan ne’e. Signifika la’ós partidu nia desizaun,” Mate-Restu subliña tan.
Komisáriu Adjuntu Comissão Anti Corrupção (CAC), Luis Oliveira Sampaio hateten, CAC rasik hetan duni informasaun sira viral rede sosiál Facebook, maibé sira seidauk hola pozisaun ida klaru, tanba iha Facebook ne’e, hanesan instrumentu ida ne’ebé ema uza atu partilla informasaun.
Maske iha informasaun balu kredivel, maibé iha mós balu ne’ebé la kredivel. Maibé CAC mós rejista hela informasaun ida ne’e molok halo kontaktu ka verifika ho entidade relevante hanesan EDTL,E.P.
“Ami la hetan keixa ida hanesan informasaun ofisial, ami haree de’it ema fahe tutan husi media sosiál Facebook sira ne’e. Entaun, ami preokupa hela katak, sé ida ne’e akontese duni, entaun, ne’e violasaun grave bá prosedimentu sira ne’ebé ligasaun ho rekrutamentu nian, no Komisaun Funsaun Públika maka iha kompeténsia plena liu, atu haree asuntu sira ne’e,” Komisáriu Adjuntu CAC bá asuntu Sensibilizasaun no Prevensaun ne’e hateten tan.
Nia halo komparasaun katak, esperiénsia ona iha kazu sira antes ne’e mosu, sempre iha CAC nia intervensaun. Maibé depois halo tiha intervensaun, ikus mai CAC tenke enkamiña kazu sira bá iha entidade relevante sira seluk.
Tuir loloos, bainhira akontese kazu sira hanesan ne’e, Komisaun Funsaun Públika (CFP-sigla Portugés), tenke halo lalais intervensaun, atu bele responde bá preokupasaun sira ne’ebé fó sai liuhusi rede sosiál sosiál hanesan Facebook ka meius komunikasaun sosiál seluk tán.
“Mais ami toma nota hela, tanba ne’e atu halo kontaktu, konfirmasaun ho prezidente EDTL, E.P, kona-bá kazu ne’e loos ka lae. Sé ida ne’e mak loos, ha’u hanoin, ida ne’e grave tebes, tanba prátika sira ne’ebé iha indísiu bá grupizmu, familiarizmu, ka partidu nian ne’e, ne’e la kontribui bá administrasaun estadu nian. Ita loroloron hasoru hela de’it situasaun sira ne’e. instituisaun hotu iha responsabilidade atu asegura kumprimenta lei ne’ebé vigór tiha ona,” Luis Oliveira Sampaio afirma.
Kona-bá rekrutamentu ajente administrasaun publika ho funsionáriu públiku hotu regula ona iha Dekretu lei númeru 22/2011, iha loron 8 fulan-Jullu. Alterasaun dahuluk ba dekretu lei númeru 34/2008, loron 28 fulan agostu (Rejime ba konkursu, rekrutamentu, selesaun no promosaun pesoál ba Administrasaun públika).
Dekretu lei númeru 34/2008, iha loron 27 fulan agostu, ne’ebé regula rejime ba konkursu, rekrutamentu, selesaun no promosaun iha administrasaun públika nesesita ka presiza atu adapta ho prinsípiu sira lei númeru 7/2009, loron 15 fulan jullu, ne’ebé kria ka hamoris Komisaun Funsaun Públika.
Presiza mós estabelese regra sira ba rejime tranzitóriu kona-bá rekrutamentu funsionáriu temporáriu sira Administrasaun publika nian, atu regula orientasaun sira ne’ebé estabelese ona ousi rezolusaun Governu númeru 42 / 2010, iha loron 17 fulan-Novembru, ne’ebé hahú polítika kona-ba konversaun ajente Administrasaun publika nian sira ba permanente.
Maibé Prezidente Interinu Komisaun Funsaun Públiku, Fausto Freitas da Silva “Liurai Tasi” la atende pedidu intervista Hatutan.com hodi dehan de’it ba nia pesoal relasaun públiku CFP nian hodi transmite de’it ba jornalista ne’e katak, parte CFP la monitoriza bá asuntu ne’e, tanba EDTL, E.P, hanesan instituisaun indireta, no sira iha polítika rasik.
