BALI (TOP) – Komandante em Xefe das FALINTIL, Kay Rala Xanana Gusmão tinan ida ne’e halo komemorasaun ba loron moris FALINTIL ba dala 47 hamutuk ho estudante Timoroan no funsionáriu sira iha konsuladu Timor-Leste iha Bali- Indonezia.
Durante selebrasaun ne’e, Xanana husu ba estudante, joventude no povu Timor-Leste kontinua fó onra ba eroi asuwain FALINTIL sira ne’ebé mate hodi fó valor ba prosesu independensia Timor-Leste hakat ba oin liu husi konsolida nafatin dame, ho fraternidade umana no tau aas interese nasionál boot liu buat hotu-hotu.
“Parabéns, tanba ohin loron espesiál ida ba ita hotu, tanba ohin 20 de Agostu loron FALINTL nian (selebra ba dala 45). Agradese ba konsuladu, agradese ba estadu hotu- hotu bele selebra hamutuk loron boot ida, importante liu ba FALINTIL maka durante tinan 24 ita konsege hari hela FALINTIL- Forsa Defeza Timor-Leste (F-FDTL), tanba ne’e, ba imi joven sira ho esperitu nafatin estuda halo di’ak, para fila karik bele ba serbi ita nia rain tau aas interese nasionál, aas liu interese hotu- hotu hodi fo kbiit no brani ba imi, tanba laklur ami liu ona, no imi la hare ona oin, imi maka sei ba kaer fali ita nia rain,” dehan Xanana.
Eis Komandante Em-Xefe das FALINTIL ne’e konsidera indepensensia Timor-Leste ohin loron sai ezemplu ba dame, tanba funu entre Timor-Leste no Indonézia tinan 24 ohin loron rezolve ona, no nasaun rua kria amizade ba malu hodi servisu hamutuk no sai ezemplu ba mundu tomak iha prosesu rekonsiliasaun hodi hari Comisaun Verdade Amizade (CVA- Timor-Leste no Indonézia).
“Konsuladu imi iha ne’e kria servisu kooperasaun di’ak nafatin hametin paz no estabilidade entre Timor-Leste no Indonezia,” Xanana apela.
Iha selebrasaun ne’e, Xanana agradese tanba marka prezensa hosi reprezentante estudante balun hodi reprezenta totál estudante hamutuk na’in-250 liu ne’ebé hala’o estudu iha area oin-oin iha Bali.
Xanana mós agradese ba sidadaun Indonézia sira ne’ebé halo servisu no apoiu tebes ba servisu konsuladu nian iha Bali.
Iha fatin hanesan, Konsuladu Timor-Leste ba Bali, Aleixo da Silva hato’o agradese tebes, tanba foin primeiraves Lider Istóriku Kay Rala Xanana Gusmão vizita Konsuladu Bali, hafoin Governu Timor-Leste deside sosa rai uma harii konsuladu permanente ne’e iha kedas tinan 2013.
Konsuladu Aleixo apresia iha vizita ne’e rona direita bele rona direita mensajen furak ne’ebé tatoli direita hosi Eis Komandante Em-Xefe das FALINTIL, Xanana hodi motiva no fó esperitu ba sira servisu makas liutan kontribui ba dezenvolvimentu Timor-Leste.
“Ami agradese ho vizita Maun Boot Xanana nian too mai fatin ne’e hodi fó fo mensajen no korajen ba ami hotu atu servisu di’ak liután hodi hatutan lider sira nia mehi hori nasaun ne’e ba oin, tanba estadu nia korespondensia iha ne’e ami servisu hamutuk nafatin ho governador Bali no povu sira hodi kria kooperasaun di’ak tebes ” nia agradese.
Entretante dadaun ne’e, ema hamutuk na’in 23 maka servisu iha Konsuladu Timor-Leste iha Bali kompostu hosi Indonézia na’in 16 no Timoroan sira ne’ebé servisu hanesan, Konsuladu, Koordenador Konsuladu, Adidu Migrasaun, Adidu Saúde no Asistente, Adidu Edukasaun no parte seguransa no jardineiru nian.
Durante vizita Konsuladu Bali, Xanana akompaña hosi konsuladu no funsionariu sira hodi halo aprezentasaun ba idak-idak nia knaar servisu no vizita tama sai edifisiu laran hodi haree ekipamentu servisu ne’ebé funsionáriu sira utiliza sufisiente hodi halo atendimentu ba servisu hotu-hotu.
