DILI (TOP) – Embaixador Repúblika Popular China ba Timor-Leste, Xiao Jianguo diskuti assuntu global balun ho Prezidente Partidu CNRT, Komandante em Xefe das FALINTIL, Kay Rala Xanana Gusmão durante oras rua resin.
Sorumutu entre diplomata China ho Komandante em Xefe das FALINTIL ne’e hala’o iha sede nasionál partidu CNRT iha Bairro dos Grilho-Dili iha loron Kuarta 17 Agustu 2022.
Prezidente Partidu CNRT, Kay Rala Xanana Gusmão akompaña husi nia vise I Prezidente, Virgilio Simith inklui Sekretariu Jeral Partidu CNRT, Francisco Kalbuadi Lay simu diplomata China ne’e iha oras tuku 3 lororaik, no enkontru remata iha oras tuku 5 lorokraik.
Hafoin sorumutu ne’e, Prezidente Partidu CNRT, Kay Rala Xanana Gusmão hateten, diplomata sira ne’ebé akreditadu iha Timor-Leste inklui China dala ruma hasoru malu hodi troka hanoin kona-ba assuntu oioin inklui mós evolusaun mundu global ohin loron nian.
“Ami ko’alia ne’e internasional, ko’alia nasionál no rejional,” hateten Xanana ba jornalista sira iha sede nasionál partidu CNRT iha Bairro dos Grilhos-Dili, Kuarta 17 Agustu 2022.
Antes ne’e mós eis Primeiru-Ministru ne’e hasoru malu ho diplomata husi Estadus Unidus Amerika (EUA) ne’ebé responsavel ba asuntu politika no ekonomia, Fausto DeGuzman hodi ko’alia mós kona-ba assuntu oioin.