DILI (TOP) — ‘Halakon’ Lei Pensaun Vitalisia sai nu’udar bala musan boot ida ba Prezidente Partidu Libertasaun Popular (PLP) atual Primeiru-Ministru Taur Matan Ruak (TMR) hodi buka votus iha tempu kampaña eleitoral desde tinan 2012 no 2017. Hafoin hetan tiha poder, promessa sira atu ‘halakon’ lei ne’e haluhan tiha fali.
Ho kampaña atu halakon tiha lei ne’e mak iha tempu ne’eba, sidadaun barak iha rai-laran hahu simpatia ho figura TMR ne’e, no aumenta tan slogan “riku fahe hanesan, no oportunidade mós fahe hanesan” sai metin liutan hodi PLP konsege hetan kadeira 8 iha Parlamentu Nasionál no TMR sai Primeiru-Ministru bainhira tama iha plata forma Aliansa Mudansa ba Progressu (AMP) ne’ebé lidera husi partidu CNRT.
Bainhira toka kona lei pensaun vitalisia, Prezidente Repúblika José Manuel Ramos-Horta hanoin hetan kedas ba promessa sira husi Primeiru-Ministru Taur Matan Ruak nian.
“Ha’u hanoin no prontu ho primeiru ministru, tanba PLP promete ne’e dala hira ona, portantu ha’u prontu para ko’alia ho bankada sira para haree sistema foun ida. La’ós atu hasai sira ne’ebé hetan tiha ona ne’e hetan ona ba. Desizaun primeiru mak ne’e ba oin la iha tan pensaun vitalisia,” PR Horta hateten ba jornalista sira bainhira hala’o vizita serbisu iha kompañia Heineken iha Hera-Dili, Kinta 23 Juñu 2022.
“Ha’u hanoin nafatin Taur Matan Ruak ema ida di’ak, sira iha parlamentu hamutuk ho ha’u prezidente repúblika devia haree ida ne’e, haree hamate tiha pensaun vitalisia maski la’ós 100 porsentu, maibé hanesan porezemplu em vez de mandatu ida de’it tinan 4 hetan ona pensaun vitalisia ne’e tenki remata, ne’e tenki taka no ne’e tenki kansela,” PR Horta afirma.
Maibé tuir PR Horta katak, ba sira ne’ebé pelu-menus mandatu 3 signifika tinan 15 ona bele haree pensaun vitalisia, maibé tenki ho kondisaun.
“Tanba, ho politik de’it bele hetan pensaun vitalisia tinan 5 no 10, agora funsionariu tenki serbisu tinan 20 no 30 para hetan pensaun oan ida, ne’e la justu tebes no ida ne’e tenki halakon tiha kedas iha nasaun doben ne’e.”
PR Horta dehan, presiza haree didi’ak mós antes halo mudansa ba sira ne’ebé simu ona hosi tinan ida ne’e ba kotuk, presiza haree didi’ak dala-ruma enkuadramentu legál ruma la fó dalan ba halo ka hasai direitu sira ne’ebé simu daudaun hela.
Fundador ba lei pensaun vitalisia ne’ebé hariku de’it grupu ki’ik balun ih arai-laran ne’e mai kedas husi governasaun dahuluk ne’ebé lidera husi Primeiru-Ministru Mai Bin Amude Alkatiri.
Entretantu, antes ne’e Vise Bankada Opozisaun CNRT iha Parlamentu Nasionál, Patrocinio Fernandes, hateten desde uluk partidu CNRT nia kompromisu fó importánsia ba proposta alterasaun lei pensaun vitalísia ne’ebé suspende hela iha PN atu bele tau iha ajendamentu hodi debate.
Author:Raimundos OkiWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
