DILI (TOP) – Prezidente partidu FRETILIN atual kandidatura ba Prezidente Repúblika ba periodu 2022 to’o 2027 Francisco Guterres Lú Olo kontinua defende aan katak, durante nia mandatu tinan lima nunka halo violasaun ba lei-inan, Konstituisaun RDTL, maibé kandidatu José Ramos-Horta nota Lú Olo durante nia mandatu ne’e viola konstituisaun dala tolu kedas.
Tuir informasaun ne’ebé The Oe-Kusi Post (TOP) asesu husi pájina ofisial Lú-Olo Ba Prezidente RDTL 2022-2027 katak, Francisco Guterres Lú Olo ko’alia nu’ udar mestre boot ida tanba explika klaru kona-ba Prezidente Repúblika ninia knaar konstitusional ida ne’e.
Durante komisiu politika ne’ebé hala’o iha munisipiu Likisa iha loron 04 Marsu 2022, Lú Olo informa ba nia apoiante sira katak, aktu Prezidenté Repúblika la fó posse ba membru governu sira ne’ebé indizita husi Primeiru-Ministru ne’e akontese horiuluk ona, maibé Lú Olo la halo esplikasaun klaru kona-ba kestaun ne’e.
“Bainhira ita haree ba kotuk, la nomeia membru governu ne’e akontese horiuluk ona ho Prezidente Repúblika sira uluk,” deklara Lú Olo durante ninia komisiu politika iha Likisa, 04 Marsu 2022.
Nia hatutan, dahuluk liu akontese hafoin krize institusionál 2006! Haree ba risku boot raan fakar dala ida tan, Primeiru-Ministru Mari Alkatiri deside rasik rezigna-an, nu’udar Primeiru-Minstru, atu evita guerra sivíl, maibé Prezidente partidu CNRT, Kay Rala Xanana Gusmão konsidera primeiru governu ne’ebé lidera husi Primeiru-Ministru, Mari Bim Amude Alkatiri inkapasidade mak krize ne’e mosu.
“Ami nain-rua Ramos-Horta ba mak hodi rezolve tiha krize ne’e no rezolve mós refujiadu sira. Ida ne’e akontese iha Alkatiri nia governasaun. Krize mosu tiha ona ma kami ba hodi rezolve,” responde Xanana ba kestaun ne’e liu husi nia diskursu iha kampaña iha munisipiu Manatuto, Sábadu, 05 Marsu 2022.
Kandidatu Lú Olo hatutan, hafoin PM rezigna-an, FRETILIN, nu’ udar partidu ho maioria iha Parlamentu Nasionál mak tenke ka’er ukun nafatin. Ne’ebé partidu FRETILIN hato’o ba Prezidente Repúblika personalidade nain-tolu maibé Prezidente Repúblika Xanana Gusmao hili ida ne’ebé nia konfia liu. FRETILIN la protesta tanba la iha kbiit konstitusionál atu konstesta desizaun husi Prezidente Repúblika.
Akontesimentu daruak akontese ho Prezidente Repúblika Taur Matan Ruak. Bainhira Primeiru-Ministru Xanana Gusmão aprezenta señora Micató Alves, nu’ udar kandidata ba Ministra Defeza, Prezidente Repúblika la simu. Primeiru-Ministru hili fali personalidade seluk!
Ho kbiit husi Konstituisaun mak Prezidente Francisco Guterres Lú Olo husu ba Primeiru Ministru indijitadu Jeneral Taur Matan Ruak atu pondera ka tetu didiak kona-ba kandidatu nain sia husi partidu CNRT no nain rua husi partidu KHUNTO.
Prezidente Lú Olo husu ba Primeiru-Ministru tetu didiak tanba hakarak VIII Governu atu sai krediível no estável to’o rohan. Maibé proposta foun la tama tanba partidu CNRT mak la ajuda Primeiru-Ministru hatuur governu kredível, estável no efisiente.
Maibé, Prezidente partidu CNRT Kay Rala Xanana Gusmão responde katak, PR Lú Olo rejeita atu fó posse ba membru governu sira husi partidu CNRT ho rajaun sira iha kazu iha Tribunal.
“Depois ami hakerek karta ba Tribunal hodi husu tuir ema sira ne’e iha duni kazu krime ka la’e. Tribunal hatan mai ami katak, ema sira ne’e laiha kazu ida. Ami lori resposta Tribunal nian ne’e hatama fali ba Prezidente Lú Olo, no Lú Olo hatan katak sei estuda lai, no sei estuda hela to’o ohin loron,” Xanana fó resposta.
