DILI (TOP) – Prezidente Repúblika (PR), Francisco Guterres Lu Olo fó kondekorasaun Colar Ordem Timor-Leste, titulu postumu ba matebian Bispo Dom Basilio do Nascimento ba ninia kontribuisaun iha luta libertasaun nasionál no lidera igreja iha tempu okupasaun Indonezia no hafoin independensia.
Kondekorasaun ne'ebé mak estadu fó nu'udar rekoñesimentu ba nia serbisu nunka kolen ba afirmasaun identidade Timoroan liuhusi hasa'e valor no prinsipiu moris katoliku iha Timor Leste.
"Estadu rekoñese kontribuisaun Dom Basílio nian iha luta ba auto-determinasaun Povu Timor-Leste. Saudozu nee kontribui ba luta libertasaun nasionál liuhusi enkontrus sekretas ho lider Frente Armada. Dom Basílio do Nascimento lidera Igreja iha tempu okupasaun Indonézia nian laós buat fásil ho konflitu oioin entre Katólikus sira. Nunee mós la fásil atu lidera Igreja iha períodu hanesan ohin loron, ne'ebé nakonu ho dezafiu modernidade," Prezidente Republika, Lu Olo hatete liuhusi komunikadu ne'ebé The Oe-Kusi Post asesu, Tersa 2 Novembru 2021.
Dom Basilio./Net
Kondekorasaun ne'e, nu'udar simbolu ne'ebé hatudu sentimentu agradesimentu hosi Estadu ba espíritu no esforsu ne'ebé labele nega manifesta durante tempu luta no prosesu konstrusaun Estadu hafoin Timor-Leste hetan ninia independénsia.
Tuir Dekretu Lei númeru 20/2009, 6 Maiu maka kria Ordem de Timor-Leste, atu hatudu rekoñesimentu Timor-Leste nian ba sidadaun nasionál no estranjeiru, iha sira-nia serbisu kontribui ba benefisiu Timor-Leste, Timoroan ka umanidade. No, Igreja Katóliku sempre asume ho dignidade sofrimentu povu tomak ninian, hamari'ik iha povu nia sorin defende direitu báziku sira. Konstituisaun rekoñese papel Igreja nian iha luta libertasaun nasionál no hafoin restaurasaun independénsia.
Estadu Timor-Leste, rekoñese no valoriza individu no institusoens, iha rai-laran no tasi-balun, inklui membru kleru ba sira-nia kontribuisaun ba luta libertasaun povu no iha prosesu dezenvolvimentu.
Dom Basílio do Nascimento iis kotu iha 30 Outubru 2021, iha Ospital Nasional Guido Valadares ho moras kardiaku, hafoin hetan atakasaun iha Covalima.
Iha loron Kinta 04 Novembru 2021, misa no seremonia funeral sei realiza iha Katedral Baukau iha tuku 10:00 dadeer, ne'ebé sei prezide husi Prezidente Konferensia Episkopal (CET), no Bispo Diocese Maliana, Dom Norberto do Amaral.
Author:Raimundos OkiWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
