Autoridade RAEOA blokeia advogadu eis padre RD labele ba Ambeno

DILI (TOP) – Prosesu julgamentu dahuluk ba kazu eis padre RD hahu ona iha Tribunal Distrital Oe-Kusi Ambeno iha loron Tersa 23 Fevereiru liuba depois adia hela de’it bainhira governu implementa ona serka sanitaria no konfinamentu orbrigatoriu iha munisipiu Dili no munisipiu balun iha rai-laran.

Nune’e hela de’it, ikus mai Tribunal desidi atu kontinua prosesu julgamentu ba dala rua nian iha loron 24-28 Maiu liuba iha Tribunal Oe-Kusi Ambeno. Ho ida ne’e, ekipa advogadu sira husi konsultor SGV ne’ebé reprezenta aguido eis padre RD sei partisipa iha julgamentu ne’e.

Advogadu ba eis padre RD, Miguel Faria katak, partisipasaun husi ekipa adgovadu sira importante tebes hodi rona deklarasaun husi vitima sira, ne’ebe aprezenta husi Ministériu Públiku.

Tanba ne’e, tuir advogadu Faria katak, depois ekipa advogadu sira preparadu atu desloka ba Oe-Kusi Ambeno.

“Maibé mosu fallansu tekniku husi autoridade Rejiaun Administrativu Espesial Oe-Kusi Ambeno (RAEOA), ne’ebé la autoriza ami atu ba Oe-Kusi Ambeno ho aviaun ZEESM,” hateten advogadu Miguel Faria ba jornalista sira iha edifisiu Tribunal Rekursu iha Kaikoli, Dili Kuarta 09 Juñu 2021.

Nia hatutan, iha loron 21 Maiu 2021, Autoridade RAEOA autoriza aviaun ZEESM hodi transporta pasajeiru balun husi Dili ba Oe-Kusi Ambeno.

“Ekipa advogadu hato’o pedidu ba Autoridade RAEOA hodi bele desloka ba Oe-Kusi Ambeno, ami hetan ona autorizasaun viajen husi Sentru Integradu Jestaun Krize (SIJK), no mós hala’o ona teste swab ho rezultadu negativu, maibé la konsege halo viajen iha loron ne’e, tanba ami nia naran la tama iha lista ne’ebé prepara husi Autoridade RAEOA,” nia esplika.

Ho ida ne’e, Tribunal Distrital Oe-Kusi liuhusi desijaun juiz koletivu, deside atu adia fali julgamentu kazu ne’e ba iha loron 07 Juñu 2021, ho intensaun katak parte hotu, liu-liu reprezentante arguidu nian tenke partisipa hodi asiste julgamentu ne’e.

Iha loron 31 Maiu 2021 lorokraik ekipa advogadu husi SGV reprezenta arguidu desloka ba Oe-Kusi Ambeno ho ro SUCCESS no to’o iha Oe-Kusi Ambeno iha loron 01 Juñu dadersan.

“Bainhira to’o iha ponte kais Kitahara Mahata  Oe-Kusi Ambeno, ekipa Covid-19 RAEOA hasoru ekipa advogadu sira, maibé la autoriza ami atu tun husi ro no obriga ami tenke fila-fali ba Dili, ho razaun katak, ami nia naran la tama iha lista pasajeiru nian, ne’ebé aprova husi Autoridade RAEOA”.

Ho situasaun ida ne’e, nia dehan ekipa informa kedas ba Tribunal Distrital Oe-Kusi, no autoridade judisial balun mós to’o iha ponte kais, hodi halo esplikasaun ba Ekipa Covid-19 RAEOA katak, prezensa ekipa advogadu sira iha RAEOA ne’e importante tebes atu partisipa iha julgamentu daruak ba kazu Topu Honis, maibé nafatin la hetan autorizasaun husi Autoridade RAEOA.

“Ekipa Advogado iha boa fe diak tebes atu partisipa iha prosesu julgamentu ne’e, maibé la hetan autorizasaun husi Autoridade RAEOA hodi hela iha Oe-Kusi Ambeno durante periodu julgamentu”.

Nia esplika, tuir regras verbal Autoridade RAEOA nian katak, maske halo ona teste ho rezultadu negativu, maibé ema hotu ne’ebé halo viajen husi Dili ba Oe-Kusi Ambeno tenke submete ba karantina durante loron 14, konsidera Dili klasifikadu nu’udar Zona Mean.

“Ekipa advogadu koopera ho ida ne’e, no prontu atu hela iha karantina, maibé Autoridade RAEOA mantein posizaun la autoriza ami hela iha Oe-Kusi Ambeno ho razaun la klaru”.

Legalmente, Autoridade RAEOA goja ninia kompetensia legal ne’ebe delega ona tuir Lei No. 3/2014 hodi hamosu ninia politika rasik ligadu ho esforsus prevensaun ba pandemia ida ne’e.

“Maibé, presiza iha fleksibilidade ba pesoal ruma ne’ebé iha ona ajenda fiksu hodi hala’o serbisu iha rejiaun ne’e, ne’ebé hetan ona autorizasaun husi SIJK”.

Ho situasaun ne’e maka prosesu julgamentu ne’ebé hala’o iha loron Segunda 07 Juñu liuba iha Tribunal Oe-Kusi Ambeno kontinua la’o sem prezensa husi ekipa advogadu sira no arguidu eis padre RD, no hafoin julgamentu Pradet Ambeno kontinua obriga labarik Topu-Honis nain 5 hodi ba hela iha uma mahon ne’ebé Pradet prepara ona, maibé labarik sira tauk no tanis ho lala’ok serbisu Pradet nian durante ne’e iha Oe-Kusi Ambeno ligadu ba visum ne’ebé tuir vitima visum obrigatoriu ida katak, sulan sira durante semana ida maka foin halo visum obrigatoriu iha Ambeno iha tinan 2020.

Entretantu, iha fulan Maiu nia laran, Autoridade RAEOA autoriza aviaun ZEESM tula ema lubuk ida ne’ebé maioria mesak militante FRETILIN de’it inklui vitima ba kazu Topu Honis nain 3 ba Oe-Kusi Ambeno, maibé ekipa advogadu sira maske hetan ona autorizasaun husi SIJK mós lahetan autorizasaun husi Autoridade RAEOA.

Notisia relevante: Abandona Ambeno-oan nain 200 resin hamlaha iha Dili maibé permite militante FRETILIN ba Ambeno

Raimundos Oki
Author: Raimundos OkiWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Xefe Redasaun & Editor

PUBLISIDADE

Online Counter