DILI (TOP) — Eis Prezidente Repúblika (PR), Ramos Horta konsidera Padre João Felgueiras nia personalidade ne’e nu’udar ema nonok ida maibé, matenek tebes bainhira iha tempu invazaun Indonézia sempre suporta hodi kontribui ba libertasaun rai doben Timor-Leste.
“Amu Felgueiras, ita hare ninia personalidade rasik ladún ko’alia hanesan Bispo Belo no sira seluk ne’ebé mak sempre ko’alia makas, maibé iha tempu luta ninia preokupasaun boot liu mak hamutuk ho Jesuita sira iha mundu tomak foti no lori problema Timor Lorosa’e nian ba sosiedade internasionál,” Ramos hato’o lia hirak ne’e hafoin partisipa misa agradesimentu aniversáriu Padre João Felgueiras ba tinan 100 iha igreja Balide, Kuarta 09 Juñu 2021.
Horta hatutan, alende nia preokupa ba luta libertasaun, nia mós preokupa futuru juventude sira nia oinsá atu hetan edukasaun ida ne’ebé di’ak no mós preokupa ba moris povu nian atu hetan kondisaun ida ne’ebé di’ak.
“Ha’u sempre ko’alia ho nia (Pe. João Felgueiras), nia hatete preokupadu ho edukasaun joven sira nian no kona-ba abitasaun ba povu. Ha’u vizita nia dala barak sempre ko’alia de’it mak oinsá joven sira bele hetan edukasaun ida kualidade no hela fatin ne’ebé dignu ba povu.”
Horta mós rekoñese, Padre João Felgueiras pesoál ida ne’ebé matenek, brani defende lia-loos, no direitu umanu joven no povu sira nian iha tempu luta ba ukun rasik-aan.
“Nia ema ida ne’ebé iha espíritu umanizmu sempre ajuda ema hotu. Nia aten, fuan no klamar ba justisa no ba liberdade. Mezmu iha tempu luta ha’u iha rai liur hanesan iha Guinea Bissau sempre simu mensajen hosi nia.”
Nia hatutan, iha tempu ukun rasik-aan sempre hetan hanoin di’ak hosi Padre João Felgueira kona-ba oinsá hare didi’ak povu no joven sira nia futuru bainhira hetan oprtunidade ba ukun rai ida ne’e.
“Iha tempu kotuk ba mak ha’u nunka ba vizita nia, nia sempre liuhosi kontaktu hatete nafatin tenki hare abitasaun di’ak ba povu, governu no estadu tenki halo tratamentu ne’ebé dignu ba povu rai ida ne’e, liafuan ne’e mak nia sempre hato’o mai ha’u.”
Entretantu partisipa iha misa agradesimentu ba tinan 100 Pe. João Felgueiras, sarani parókia Balide inklui komunidade balun no líder karismátiku Kayrala Xanana Gusmão no eis Prezidente Repúblika hanesan mós Premiadu Nobel ba Dame Ramos Horta, misa agradesimentu ne’e rasik prejide hosi Arsebispo Arkidioseze Metropolitana Dili, Dom Virgílio do Carmo da Silva.
