TURON (TOP) – Komandu Polisia munisipiu Manufahi konsege ka’er ona membru arte ritual husi KORK nain 66 iha aldeia Turon, Suku Babulo, munisipiu Manufahi molok hala’o atividade ezame sa’e sintu no juramentu “hemu ran”.
Bazeia ba informasaun ne’ebé The Oe-Kusi Post asesu husi News "Roman Ba Sosiedade" ARS katak polisia ka’er ema hirak ne’e iha loron Kuarta 15 Jullu 2020 iha aldeia Turon, suku Babulo, postu Same, munisipiu Manufahi ho atributu arte marsiais KORK nian.
Komandante Komandu Polisia Manufahi Superintendenti Polisia Joni Viana das Regras katak husi ema nain 66 kompostu husi mane na’in 64 feto na’in 2, kompostu idade adultu na’in 49 no idade minoridade na’in 17, hafoin halo kapturasaun no lori kedas ba iha Kuartel Polisia Manufahi hodi submete ba prosesu investigasaun durante oras 12.
Komandante Joni Viana hatutan, polisia mós informa direita kedas ba Ministériu Públiku hodi prosesu tuir lei ne’ebé iha.
