PHNOM PENH (TOP) – Primeiru-Ministru eleitu governu Cambodia promete ona sei kontinua fó tan bolsu estudu ba estudante Timoroan sira ne’ebé iha prestasaun di’ak maibé, laiha kbi’it atu kontinua sira nia estudu bai ha nivel universitariu.
Vise Primeiru-Ministru, Ministru Koordenador ba Assuntu Ekonómiku, Ministru Turizmu no Ambiente, Dato Sri Francisco Kalbuadi Lay hateten, nia prezensa iha kapital Phnom Penh, tanba simu no hetan konvite husi Primeiru-Ministru, Hun Manet ne’ebé assume kargu ne’e desde iha loron 01 Agusto 2023.
“Ha’u simu konvite husi Hun Manet ne’ebé foin eleitu nu’udar Primeiru Ministru Cambodia nian. Oportunidade ne’e iha dadersan ha’u hasoru ona Ministru Turizmu inklui Ministra Komersiu, no ohin lorokraik ne’e mak hasoru malu ho Primeiru Ministru, Hun Manet no ami ko’alia buat lubuk ida,” hateten Vise Primeiru-Ministru, Ministru Koordenador ba Assuntu Ekonómiku, Ministru Turizmu no Ambiente, Dato Sri Francisco Kalbuadi Lay, Segunda 28 Agusto 2023.
Vise Primeiru-Ministru ne’e esplika, husi sorumutu hirak ne’e nia konvida governante sira husi governasaun Hun Manet atu bele vizita Timor-Leste hodi explora potensialidade iha área ekonomia, komersiu, negósiu no industria nian.
“Governante hirak ne’e konkorda ona balun sei vizita ita nia-rain ho sira nia setor privadu sira atu bele explora ita nia potensilidade sira molok estabelese akordu bilateral ruma iha área ekonomia no negósiu,” nia esplika.
Iha parte sorumutu ho Primeiru-Ministru, Hun Manet, visita Primeiru-Ministru ne’e esplika, governu foun Cambodia sei kontinua nafatin tulun Timor-Leste iha área oin-oin to’o Timor-Leste sai full member ba ASEAN.
“Primeiru-Ministru Cambodia mós hateten ona sei kontinua fó bolsu estudu ba Timoroan sira atu mai kontinua sira nia estudu iha nivel superior iha ne’e,” nia esplika.
Governante ne’e hahu vizita Cambodia dala barak ona, no hahu vizita nasaun ne’e desde iha tinan 1994 to’o ohin loron.
Nia konsidera, relasaun bilateral entre rai-rua ne’e komesa metin ba dadauk ona, tanba iha lideransa Cambodia nian iha ASEAN mak halo Timor-Leste sai observador permanente iha organizasaun rejional ne’e, no oras ne’e kontinua apoiu Timor-Leste iha setor oin-oin to’o sai full member.
Nia esplika, durante pandemia Covid-19 nasaun barak iha mundu inklui nasaun membru ASEAN sira hetan sofrimentu maka’as kona-ba ekonomia tun, maibé Cambodia konsege hakat-liu situasaun ne’e ho di’ak, tanba hafoin pandemia Covid-19 nasaun ne’e hetan rendimentu maka’as iha setor turizmu.
“Hafoin pandemia Covid-19, turista sira ne’ebé vizita Cambodia kada tinan kuaje millaun 13. Ida ne’e mak ita tenki aproveita inklui mós ita tenki kria solidaridade, fiar no konfiansa ne’ebé kria kleur ona, hahu eis Primeiru Ministru Hun Sen ho maun boot Primeiru-Ministru, Kay Rala Xanana Gusmão koñese malu iha tinan 2002 to’o ohin loron, ha’u mai atu kontinua de’it, tanba ohin loron nia oan mak sai Primeiru Ministru hanesan mós ha’u nia kolega rasik. Ha’u mós hanesan konvidadu dahuluk mai vizita Cambodia hafoin simu kna’ar foun ne’e,” nia esplika.
Iha fatin hanesan, embaixador Timor-Leste ba Cambodia, Hermenegildo Kupa hateten, prezensa Vise Primeiru-Ministru, Ministru Koordenador ba Assuntu Ekonómiku, Ministru Turizmu no Ambiente, Dato Sri Francisco Kalbuadi Lay iha Phnom Penh ne’e positivu tebes, tanba Vise PM ne’e iha relasaun di’ak tebes ho Primeiru-Ministru foun Cambodia nian, no mós koñese di’ak rai ne’e kleur tiha ona.
“Positivu ida mak Cambodia kontinua fó tan bolsu estudu bai ta nia estudante Timoroan sira atu mai eskola iha ne’e,” esplika embaixador Kupa.
Nia hatutan, antes ne’e iha ona estudante Timoroan hamutuk nain-10 ne’ebé durante ne’e eskola iha Cambodia no besik atu hotu ona.
Ministru Turizmu Cambodia, Sok Soken apresia tebes ho vizita ida ne’e, no komunika ho nia Primeiru-Ministru atu oinsa bele estabelese tiha akordu bilateral ida ho Ministru Turizmu no Ambiente Timor-Leste iha área Turizmu.
Nune’e mós, Ministra Komersiu Cambodia, Cham Nimul hateten, sei partisipa simeira ASEAN nian iha Jakarta, no sei mobilita setor privadu sira husi Cambodia atu halo vizita ida ba Timor-Leste.
