DILI (TOP) – Jornalista Australiana, Jill Jollife ne’ebé mak halo gravasaun audio iha loron Proklamasaun Independénsia Unilateral RDTL nian ne’ebé Fretilin proklama iha 28 Novembru 1975, no halo mós gravasaun audio ba investidura Prezidenti Repúblika iha, 29 Novembru no posse ba governu dahuluk RDTL nian iha, 30 Novembru 1975 iis kotu ona iha Australia hafoin sofre moras durante tinan barak nia laran.
Tuir Komunikadu ba Imprensa husi Centro CHEGA! Katak, Timor-Leste nia belun solidariu, Jill Jolliffe hakotu is horiseik, 02 Dezembru 2022 iha Australia, tanba falla kardiaku.
Jornalista Jill Jollife halo entrevista ida ho komandante Nino Konis Santana./Net.
Jill hahu hatudu nia apoiu ba Timor-Leste nia ukun rasik-an iha kedas tinan 1974 nu’udar jornalista no ativista, nia asiste prosesu dekolonizasaun iha Timor Portugés to’o ba loron 10 antes Indonézia invade RDTL.
“Jill mak halo gravasaun audio ba loron Proklamasaun Independénsia Unilateral RDTL nian ne’ebé Fretilin proklama iha 28 Novembru, halo gravasaun audio ba investidura Prezidenti Repúblika iha, 29 Novembru nomós posse ba Governo Dahuluk RDTL nian iha, 30 Novembru 1975. Gravasaun sira ne’e agora preserva iha Arkivu Australia no iha Centro Nacional Chega!I.P, Balide-Dili,” komunikadu ba imprensa husi Centro CHEGA!.
Jornalista Jill Jollife (liman loos) badak oan ne'e hasai foto hamutuk ho Proklamador Francisco Xavier do Amaral iha portu Dili iha tinan 1975./Net.
Durante Okupasaun Indonézia, Jill kontinua mobiliza solidariedade internasionál ba Luta Timor nian. Nia mós hola parte iha Ro’o Lusitânia Espresso ne’ebé atu mai Timor iha 1991, maibé Indonézia laautoriza.
Hafoin Ukun-an, Jill kontinua halo serbisu ho Eis Prizoneiru Politiku Timoroan sira hodi dokumentu prizoneiru sira nia memória iha programa Memoria Viva ne’ebé dadaun ne’e arkivu mós iha Arkivu Centro Chega! nian.
Iha 2017, Jill hahu moras no liuhusi Pedidu Nai Primeiru Ministru nian iha tempu ne’ebá, Dr. Rui Maria de Araújo, Centro Chega! representa governo Timor-Leste fó apoiu orsamentu hodi apoiu tratamentu saúde ba Jill.
Timor-Leste lakon belun ida ne’ebé grava memória luta Povu Timor-Leste nian ba ukun rasik-an ho ispiritu ne’ebé aas tebes tanba Jill fiar ba Povu Timor-Leste nia persistensia no solidariu Umana.
Author: The Oekusi PostWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
www.OeKusiPost.com nu’udar plataforma media online iha Oe-Kusi Ambeno, Timor-Leste ne’ebé aprezenta notísia iha área oioin iha teritóriu nasionál.
Rua. Numbei, Oe-Kusi Ambeno
Mobile: +670 7723 4114
Email: info (at) OeKusiPost.com
