SINGAPURA (TOP) – Prezidente Repúblika, José Ramos – Horta bainhira hasoru malu ho xefe estadu, Halimah Yacob inklui xefe governu Singapura, Lee Hsien Loong kompromete atu kontinua apoiu nafatin Timor – Leste liuhusi área kapasitasaun ba funsionáriu baibain no diplomata sira iha tinan oin.
“Número um ba ita ho sira mak kapasitasaun rekursu umanu, entaun sira hato’o prontidaun bele halo, tanba sira ninia serbisu iha área funsaun públika di’ak tebes iha mundu, sira iha esperíensia ba área ne’e, entaun sira prontu tulun pelumenus 700 ka 800 Timoroan no sira prontu mós ajuda ita nia Minstériu Negósiu Estranjeiru no Kooperasaun halo formasaun ba ita nia diplomata sira,” Prezidente Horta hateten ba jornalista sira hafoin remata enkontru ho líder nasaun ne’e iha Palásiu Prezidénsial Singapura iha Orchard Road, Kinta 08 Dezembru 2022.
Kona-ba formasaun, Prezidente Horta katak, Singapura hakarak oferese di’ak liutan mak hala’o iha Timor-Leste nune’e bele hafasil di’ak liután atu ema hotu-hotu bele tuir hodi aprende matenek ne’ebé mak atribui husi formador sira.
“Ha’u hanoin balun de’it mai halo iha Singapura, más barak liu tenki halo ka fó formasaun iha Timor, haruka sira ninia tékniku ba hodi fó formasaun, nune’e fasil liu ba Timoroan bele barak liu aproveita oportunidade ne’e no bele gasta osan itoan de’it, duke mai tuir formasaun iha sira ninia rain.”
PR Horta dehan, “kapasitasaun ne’e sei bele hala’o iha tempu badak, hein de’it bainhira sekretariadu ASEAN hamutuk ho ita ho governu Indonéziu, tanba tinan oin, 2023 sira mak lidera fali ASEAN, prepara ho ita road map sei iha kalendáriu kona-ba aspetu ne’ebé Timor-Leste tenki kumpri hodi hadi’a aan no konforme road map ne’e sé ita kumpri mak ita ho Singapura hahú programa ne’e.”
