SINGAPURA (TOP) — Prezidente Repúblika, José Ramos Horta hatete, grupu emprezarial husi nasaun Kuwait ne’ebé liderahusi na’in ba kompañia Al-Bader International Development Co W.L.L, Yousef A. Al-Bader no grupu Open Society Foundation lidera husi bilionáriu Estadus Unidus Amerika (EUA), George Soros hato’o ona sira ninia prontidaun atu halo investimentu iha Timor-Leste.
“Sira hakarak halo buat barak ba Timor hanesan halo ona iha Afríka, sira bele halo planu ba Timor-Leste liu-liu kona-ba ospitál, aeroportu, estrada no uma ba ema ki’ak rihun ba rihun tuir negósiasaun ruma. Sé governu interesadu bele hasoru sira hodi diskute prepara ka halo planu investimentu ida ne’e,” Prezidente Horta hateten ba jornalista hafoin ramata enkontru ho bilionáriu Al-Bader iha Singapura, Kuarta 07 Dezembru 2022.
“Grupu ne’e boot ida, sira bele finansia diretamente ka bele mobiliza investidór seluk inklui banku (halo atividade emprestimu ho funan 3%). Investimentu ne’e bele hatete la iha limite, izemplu, ha’u husu sira sé bele finansia Greater Sunrise. Sira hatete to’o billaun US$ 12 resin sira bele finansia atividade ne’e,” dehan xefe estadu.
Prezidente Repúblika, José Ramos Horta hala'o vizita estadu durante loron 6 iha Singapura./Net.
Alende prontu investe iha área infraestrutura hanesan konstrui estrada no seluk tan, kompañia ne’e mós hanoin mós investe iha área turizmu, tanba tuir sira área ne’e nia impaktu pozitivu tebes tanba bele fó serbisu barak ba sidadaun Timor ho númeru ne’ebé mak boot.
Xefe estadu mós informa, enkontru ne’e maske la’ós ofísial, maibé nu’udar aman ba nasaun iha dever no obrigasaun tulun mós governu para solusiona problema ne’ebé akontese, liu-liu oinsá tau forsa no hanoin hamutuk hodi kombate dezempregu nune’e kria empregu ba sidadaun liu-liu joven sira hod evita sai hotu ba rai li’ur.
Sorin seluk xefe estadu fundamenta, grupu ne’e la’ós fundasaun maibé, empreza finanseira, kualkér atividade ne’ebé hala’o prontu halo hanesan parseiru, parte kompañia ho governu Timor bele tau osan hamutuk no prontu ezekuta planu estratejiku ba iha dezenvolvimentu ne’ebé governu rasik mak deside.
“Ida ne’e ha’u bele ko’alia de’it ho idea, más ne’e depois kuandu sira prontu bele ba Dili ko’alia diretamente ho governu. Maibé, antes ne’e sira ninia ema ida iha ona Dili, no kontente loos tanba fulan ida iha Timor observa situasaun di’ak loos, sente kontente ho populasaun.”
Kona-ba enkontru ho grupu bilionáriu husi Estadus Unidus Amerika diskute oinsá bele kontribui idea briliante ruma hodi hadi’a serbisu balun ne’ebé halo liu-liu kona-ba oinsá halo planu ba iha dezenvolvimentu nasionál.
George Soros./Net.
“Iha enkontru ne’e ha’u husu ba sira ajuda halo avaliasaun planu estratéjiku dezenvolvimentu nasionál ita nian, tanba ita hahú ona planu ba dezenvolvimentu ne’e ninia implementasaun iha 2011, tinan sanulu liu tiha ona no planu ne’e atu remata iha 2030, para sira bele ajuda haree saida mak halo di’ak no saida mak fallansu iha planu ne’e (hodi bele hadi’a di’ak liután),” xefe estadu akresenta.
Xefe estadu fó ezemplu, sé iha planu antes la iha referénsia ba dizitalizasaun entaun tenki hatama planu kona-ba teknolojia dizitalizasaun ba iha planu ne’e nia laran.
“Kuandu ita tetu estratejia ba dezenvolvimentu labele haluha ida ne’e, tanba ida ne’e la halo parte iha planu estratejiku dezenvolvimentu nasionál 2011-2030,” dehan xefe estadu.
Tanba tuir xefe estadu, governu atual hahú halo revizaun ba iha planu dezenvolvimentu nasionál ne’e.
“Ha’u rasik simu ekipa ne’ebé halo revizaun no sira halo fulan balun liu tiha ona, besik atu ramata entaun ita tau planu revizaun iha meza para haree.”
“Ida ne’e ha’u nia intensaun nu’udar prezidente para depois halo hanesan debate nasionál ida ho governu agora ou governu foun ne’ebé mai, inklui akadémiku no partidu polítiko tau idea hamutuk hanoin kona-ba futuru tinan lima ka sanulu ita hakarak ba ne’ebé ho ita ninia ekonomia, edukasaun ho infaestrutura, ne’e mak ezersisiu ne’ebé mak ha’u halo hanesan aman ba nasaun.”
Tanba fundasaun lidera husi bilionáriu George Soros ninia ekipa hahú serbisu tiha ona no iha fulan Janeiru ho Fevereiru tinan oin bele entrega ona proposta ba governu hodi diskute no deside ba Timor ninia di’ak ohin no ba iha futuru.
The Oekusi Post (TOP) observa, enkontru ho grupu bilionariu rua ne’e Prezidente Horta akompaña husi embaixadora Timor-Leste ba Singapura, Natalia Carrascalão, asesor relasaun internasional, Marciano Octavio Garcia da Silva, asesor finansa no ekonomia, Helder Lopes, asesor espesial ba iha jestaun, Fun Ha Tchong no husi governu Ministru Koordenador Asuntu Ekonomia, Joaquim Amaral.
Author:Raimundos OkiWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
