DILI (TOP) – Ministru Justisa, Tiago Amaral Sarmento, halo esforsu hodi muda estatutu defensoria públiku ba autonomu finanseiru no administrativu duke iha Ministériu Justisa nia okos tinan ba tinan sempre hatodan demais orsamentu ba ministériu.
Tuir komunikadu ne’ebé TOP asesu husi pájina ofisial gabinete Ministériu Justisa katak, bainhira hala'o reuniaun ho konsellu konsultivu iha cafetaria ministériu ne'e nian, membru ezekutivu ne'e informa ba dirijente sira katak, halo ona konsultasaun ho reprezentante povu husi bankada opozisaun no governu, membru orgaun lejislativu sira kompromete ho fuan boot katak sei halo alterasaun ba estatutu instituisaun ne'e nian hodi fo espasu para servisu mesak buka osan hodi labele tabele hodi hatodan fali ministériu justisa.
"Ha'u komunika ona ho bankada opozisaun no governu, sira prontu halo alterasaun ba estatutu defensoria públiku, nune'e defensoria públiku bele sai instituisaun autonomu finanseiru, patrimonia no administrativu," deklara ministru iha komunikadu imprensa, Kuarta 13 Jullu 2022.
Ministru Tiago akresenta razaun tanba sa mak halo esforsu hodi muda lalais tiha estatutu husi instituisaun refere, para servisu bele lais la iha intervensaun husi instituisaun sira seluk.
"Razaun lei organizasaun judisiariu em vigor, ne'e ezije buat barak-barak tribunal, juiz, prokurador no defensor públiku sira, agora defensoria públiku ita tenki tau autonomu nune'e bele bo'ok aan ho lais, oinsa mak CAC ho PCIC ne’ebé la temi iha konstituisaun RDTL bele autonomu, defensoria públiku labele fali," ezekutivu ne'e dehan.
Ezekutivu ne'e reforsa liutan, "razaun segundu defensoria públiku ninia natureza loloos maka autonomu nanis kedas tuir konstituisaun, maibe tanba governu iha momentu ne'eba foin hahu ne'e mak halo defensoria públiku iha fali ministériu justisa nia okos. Ida ne'e halo orsamentu kada tinan ba diresaun jeral servisu notariadu, diresaun jeral terras no propriedade no departamentu seluk orsamentu menus."
Nune'e, ho razaun sira ne’ebé iha maka ezekutivu ne'e husu ba diresaun nasional assesoria juridika no lejislasaun (DNAJL), oinsa buka meius bele aselera lalais estatutu instituisaun refere.
Alende ne'e, antes hahu ko'alia asuntu atu muda estatutu instituisaun refere sai ba autonomu, iha inisiu fulan ida ne'e ezekutivu ne'e hala'o vizita hodi haree direita kondisaun edifisiu instituisaun ne'e nian.
