DILI (TOP) – Suku sira iha munisipiu 12 iha teritóriu nasionál sei simu ona sira nia subsidiu osan $1 00 ba kada uma kain semana oin, maibé povu Oe-Kusi Ambeno seidauk bele simu, tanba konta bankaria sira husi suku 18 mak seidauk to’o Dili no la rejista iha sistema finanseira Ministériu Finansas nian.
Iha loron 3 Juñu foin lalais, Vise Primeiru-Ministru, Armanda Berta katak iha loron 9 Juñu 2020, uma kain sira iha munisipiu 12 la inklui RAEOA sei simu ona subsidiu osan.
Diretor Jeral Ministériu Solidaridade Sosial no Inkluzaun (MSSI), Rui Exposto esplika, atu hetan subsidiu osan $100 ne’e tenke priense rekezitu sira. Katak, dadus sira ne’ebé mai husi administrasaun Estatal ne’e tenke mai ho konta bankaria kada suku.
“Iha fatin ida ne’e, Oe-Kusi Ambeno to’o agora seidauk fó konta bankaria mai MSSI. Ministra hakerek ona karta ida ba iha Prezidente Autoridade hodi delega tekniku ida atu mai Dili hodi hare ba kestaun ne’e, maibé semana ida ona la mai, entaun ami tenke hahu ona desidi hodi halo uluk pagamentu iha munisipiu 12,” esplika Rui Exposto liu husi programa Grande Intervista iha GMN TV, Kinta 04 Juñu 2020.
Nune’e mós, Diretor Jeral Planeamentu Orsamentu no mós nu’udar Koordenador Sekretariadu Tékniku Fundu Covid-19, Januario de Gama katak, Rejiaun Administrativa Espesial Oe-Kusi Ambeno (RAEOA) –Zona Espesial ba Ekonómia Sosial Merkadu (ZEESM) goja ninia autoridade espesial.
“Durante ne’e ba munisipiu 12, Ministériu Finansa laiha problema, tanba konta bankaria ne’ebé durante ne’e utiliza atu halo transferensia orsamentu operasional ba suku eziste hela iha sistema finanseiru Ministériu Finansas nian,” nia esplika.
Nia hatutan, bainhira atu halo pagamentu ba subsidiu uma kain presija de’it halo konfirmasaun ho MSSI atu hare katak konta bankaria sira ne’e la ajustadu, no karik balun iha ona mudansa presija ajusta fali hodi bele halo pagamentu.
“Agora partikularmente ba RAEOA-ZEESM, tanba durante ne’e transferensia kustu operasional ba iha suku ninian, osan sira ne’e autoridade RAEOA mak diretamente halo ba iha suku sira iha Oe-Kusi Ambeno.”
Nia dehan, konta bankaria ne’ebé uja ba suku sira la rejista iha sistema finanseiru Ministériu Finansas nian. Tanba ne’e mak ho koordenasaun ne’ebé mak Ministériu Finansas halo ho MSSI katak presija halo koordenasaun ho RAEOA-ZEESM hodi hare disponibilidade oinsa mak fornese ona sira nia konta bankaria sira hodi nune’e bele transfere osan ba sira nia konta suku nian.
Diretor Jeral Desentralizasaun Administrativa husi Ministériu Estatal,
Amandio Gastão de Sousa hateten, munisipiu 12 inklui RAEOA dadus kompletu ona, no entrega tiha ona ba iha MSSI iha loron 16 Maiu kotuk, ne’e kompletu.
Agora oinsa mak RAEOA ne’e seidauk, ida ne’e kompetensia husi MSSI nian, no MSSI esplika, husu ona tékniku ida husi Oe-Kusi Ambeno atu mai Dili, maibé semana ida ona la mai.
Tanba saida mak la husu kedas konta bankaria iha tempu verifikasaun dadus, maibé diretor ne’e argumenta, Oe-Kusi Ambeno nu’udar rejiaun espesial ida ne’ebé administrativamente nia ketak, entaun iha diploma ministérial konjuntu entre Ministériu Finansas ho Ministériu Administrasaun Estatal ba de’it konta bankaria suku sira iha 434 exklui tiha suku 18 husi RAEOA.
Nia hatutan, durante hahu iha tinan 2017 subsidiu operasional ho subsidiu fixu ba Konsellu Suku sira liu husi konta bankaria suku ne’e.
Governu ofisíalmente anunsia ona ba públiku atu fó subsídiu $100.00 ba uma kain hamutuk 298.119 ne’ebé dadus friza ona iha teritóriu laran tomak (la inklui RAEOA) tuir promesa ne’ebé governu hato’o ona, nu’udar resposta ba efeitu ekonomia durante propagasaun pandemia surtu Covid-19 ne’ebé implika ba vida ekonomia povu nian. Governu sei selu ba fulan rua nian, Abril-Maiu, ne’ebé kada uma kain sei hetan $200.00.
Administrasaun Estatal Oe-Kusi Ambeno rejista katak, total uma kain mak 20.331.
Oráriu pagamentu ba uma kain ne’ebé Banku Nasionál Komérsiu Timor-Leste (BNCTL) anunsia ona;
Munisípiu:
- Aileu: 8 to’o 9 Juñu 2020
- Ainaro:8 to’o 9 Juñu 2020
- Baucau; 8 to’o 10 Juñu 2020
- Bobonaro: 8 to’o 10 Juñu 2020
- Covalima: 8 to’o 10 Juñu 2020
- Dili : 8 Juñu 2020
- Ermera: 8 to’o 10 Juñu 2020
- Manufahi: 8 to’o 10 Juñu 2020
- Manatuto: : 8 to’o 10 Juñu 2020
- Lautem : 8 to’o 10 Juñu 2020
- Likisá: 8 to’o 9 Juñu 2020
- Vikeke: 8 to’o 10 Juñu 2020
Data ne'ebé mensionadu ne'e, BNCTL sei hahu selu ba ekipa pagamentu kada suku ne'ebé sei konsentra iha kada postu administrativu sira iha teritoriu tomak, simultaniamente, hahu husi loron 08 to'o 10 Juñu 2020. Hafoin ida ne'e ekipa pagamentu suku sei selu ba kada uma kain ne'ebé elijivel durante loron 14 nia laran, hahu husi loron 09 Junu to'o remata.
