DILI (TOP) – Kultura le’e no hakerek iha Timor-Leste sei kontinua sai preokupasaun boot, tanba ne’e Prezidente Repúblika José Manuel Ramos-Horta kontinua husu ba sidadaun hotu iha rai-laran liliu ba estudante sira husi ensinu báziku to’o ensinu superior tenke hatoman aan ho le’e hodi aumenta loke hanoin sai luan tan, tanba livru nu’udar janela ba mundu.
Palásiu Prezidensial hahu loke atividade feira livru iha área prezidensial hahu iha loron Sesta 15-17 Jullu 2022.
Iha atividade ne’e iha feira livru oioin ne’ebé aprezenta husi instituisaun lubuk ida. Atividade ne’e mós hetan suporta husi governu liu husi Ministériu Edukasaun, embaixada Portudal iha Dili, Instituto Camões, Timor Telecom, Telkomcel no instituisaun sira seluk tan.
“Husu ba ki’ik oan sira, estudante sira tenke le’e barak, labele hare de’it Tik Tok iha telefone laran,” PR Horta husu ba estudante sira durante seremónia enseramentu feira livru iha áreador palásiu prezidensial, Dili, Domingu 17 Jullu 2022.
Dezenvolvimentu sektór edukasaun hanesan pontu importante ida atu prepara rekursu umanu ida ne’ebé kualidade no matenek hodi kontinua dezenvolve Timor-Leste ba futuru ida ne’ebé nabilan. Maski hasoru difikuldade no dezafiu ne’ebé barak, maibé entidade relevante sira sempre iha hanoin ida hodi kontinua dezenvolve sektór edukasaun maski neineik maibé beibeik tanba Timor-Leste opta polítika ida de’it iha sektór edukasaun katak “Edukasaun Universál ba ema hotu” hanesan hakerek nanis ona iha Konstituisaun RDTL, Artigu 59.
Atu garante edukasaun ida kualidade ba timoroan hotu, Governu liu husi Parlamentu Nasionál kada tinan sempre aprova orsamentu tuir nesesidade sektór edukasaun nian tuir planu programa prioridade husi Ministériu Edukasaun rasik, liu-liu dezenvolvimentu infraestrutura eskolár, formasaun Profesór sira no seluk tan.
Sektór edukasaun mak hanesan xave ba dezenvolvimentu iha futuru mai nune’e, Prezidente Repúblika, Dr. José Ramos Horta rasik mós hato’o iha nia diskursu wainhira selebra loron Restorasaun Independénsia 20 Maiu 2022 katak, dezenvolvimentu sektór edukasaun mós sai prioridade ida hanesan ho prioridade sira seluk durante mandatu Prezidente Repúblika tinan lima mai.
Atu garante kompromisu Prezidente Repúblika nian ba área edukasaun, nune’e Assessoria ba asuntu Edukasaun nia prepara planu programa “Feira do Livru” hanesan programa inisiál ida hodi korresponde ba kompromisu ne’ebé hola parte ba loron atus ida (100) servisu Prezidénsia Repúblika nian iha area Edukasaun nian.
Programa “Feira do Livru” hetan mós hetan aseitasaun husi Prezidente Repúblika, nune’e Assessoria ba asuntu edukasaun ne’ebé lidera husi Asesóra Dulce de Jesus Soares ho ekipa realiza kedas reuniaun maratona hamutuk ho parseiru xave sira ba implementasaun programa Feira do Livru ne’e.
Feira livru ho tema: “O Livru é uma Janela para o Mundo”
ne’e sei implementa iha ámbitu loron komunidade CPLP nian. Programa ne’e hala’o iha Jardin Palásiu Prezidensiál, durante loron rua ho balun, no hahú iha tuku 3 lokraik, loron 15 to’o loron 17 fulan-Jullu tinan 2022.
Eventu Feira do Livru mós sei aprezenta livru ho títulu oin-oin no livru hirak ne’e mós sei promove ho lian ofisiál Tétum no Portugés, ne’ebé sei oferese husi ajénsia no pesoál sira ho folin baratu, nune’e públiku sira liu-liu estudante no komunidade eskolár sira bele iha kbiit hodi sosa. Iha programa Feira do livru rasik mós sei promove talentu estudante sira nian durante feira ne’e la’o liu husi aprezentasaun múzika, dansa, poezia no seluk tan husi eskola hirak ne’ebé indika tiha ona husi Munisípiu Dili, Aileu, Liquiçá no Manatuto no ba futuru sei abranje ba munisípiu sira hotu.
Objetivu husi eventu ne’e mak: a. Promove Lingua ofisiál b. Promove vontade Lee livru ba Estudante sira c. Promove lasu amizade entre estudante husi eskola oi-oin d. Promove talentu estudante sira.
Atu hatene klean liután kona-ba eventu Feira Livru ne’e, parte Mídia Prezidénsia Repúblika nian sei hala’o konferénsia imprensa ida iha Palásiu Prezidensiál ohin loron 15 fulan-Jullu tinan 2022, iha tuku 2 lokraik, ne’ebé Porta Voz Prezidénsia Repúblika, Roger Soares no Asesóra Asuntu Edukasaun, Dulce de Jesus Soares mak sei hato’o esklaresimentu ruma.
