Oekusipost.com Dili – Madre sira husi Congregatio Imitationis Jesu (CIJ) fahe ona ai-moruk balun ba ekipa seguransa sira ne’ebé fó seguransa ba fatin kuarentena sira iha Dili laran, no fahe mós ba jornalista sira.
Madre esplika, sira prepara ai-moruk ne’ebé falun ho plastiku ne’e ba ema ida, no prosesu atu konsumu ne’e suru kanuru ida tau ba bee kopu ida.
Ai-moruk nia funsaun ne’e, tuir madre ne’e katak atu preve moras virus corona (COVID-19), no aumenta imunidade isin.
“Tanba ne’e mak ami hare ita nia seguransa sira hala’o serbisu husi dadersan to’o kalan, ami oferese ba sira hodi bele hala’o sira nia serbisu ho di’ak, no bele prevene moras,” hatete madre Maria Evarista ba jornalista sira iha kuarentena Hotel-SK, Meti-Aut, Dili Sábadu 18 Abril 2020.
Nia hatutan, sira fahe ona ai-moruk ne’e ba fatin kuarentena hamutuk 8 ona iha Dili laran, no fahe ba polisia sira de’it.
Ai-moruk ne’ebé falun iha plastiku laran, madre sira prepara 60, no ai-moruk ne’ebé kahur tiha ona ho bee hamutuk 100.
“Tanba ami hare situasaun moras ne’e aumenta ba bebeik mak ami mós halo asaun ne’e. Ohin mak foin hahu halo asaun ne’e,” nia esplika.
Jornalista sira ne’ebé simu ai-moruk ne’e mak nain 4 husi RTTL hanesan, Nuno Saldanha, Julio da Silva Nascimento, Cristovão da Silva, inklui husi Oe-Kusi Post ida.
