COVID-19: Ambulansia Evakua Ona Pasiente Nain 5 Husi Tasi-Tolu

Kareta ambulansia ba tula tan pasiente COVID-19 nain 5 iha kuarentena Tasi-Tolu, Dili iha Kinta 16 Abril 2020 oras tuku 11:15 kalan. Foto Supply.

Oekusipost.com Dili – Ekipa ambulansia tula sai tiha ona ema nain 5 husi kuarentena Tasi-Tolu lori ba sentru izolamentu iha sentru saúde Vera Cruz hodi hetan tratamentu intensivu. 

Sidadaun kuarentena Tasi-Tolu ida ne'ebé husu ba Oe-Kusi Post atu labele públika nia identidade iha notisia ne'e katak, nia maluk sira ne’e halo ona preparasaun iha lorokraik kedas hodi hein kareta ambulansia atu mai tula sira. Ema nain 5 ne'e mak iha feto 2 no mane 3.  

“Maibé kareta ambulansia foin mak mai tula iha kalan boot oras tuku 11:15,” hateten sidadaun kuarentena ne’e via kontaktu telemové ba Oe-Kusi Post, Kinta 16 Abril 2020. 

Nia hatutan, total sidadaun kuarente sira iha Hotel Katuas ne’e hamutuk nain 37, no ema nain 15 sai tiha ona balun negativu no balun positivu no oras ne’e falta ema nain 22 mak sei iha hela kuarentena Tasi-Tolu. No ema nain 5 ne'e, nia rezultadu mak anunsia ona husi dotora Odete da Silva Viegas iha Sentru Integradu Jestaun krize, Kinta 16 Abril 2020 oras tuku 3 lorokraik.   

 

Sidadaun Kuarentena Tasi-Tolu. Foto Supply. 

Entretantu, Sentru Integradu ba Jestaun Krize fó sai rezultadu kazu positivu moras virus corona (COVID-19) iha loron Kinta 16 Abril 2020 katak, ema hamutuk nain 10 husi Hotel-Katuas mak oras ne’e rezultadu teste hatudu positivu kona moras COVID-19, no ekipa ambulansia tula ona nain 5 ba sentru izolamentu iha Vera Cruz hodi hetan tratamentu intensivu.  

Notisia relevante: COVID-19: Kazu Pozitivu Hamutuk Nain 17 Ona 

Nia hatutan, sei iha ema hamutuk nain 567 mak oras ne’e hela iha kuarentena ne’ebé kompostu husi Dili iha nain 456, no husi munisipiu hamutuk nain 111. Auto-kuarentena iha Dili laiha ona, no iha nain 6 mak halo auto-kuarentena iha munisipiu sira. Iha mós ema hamutuk nain 1339 mak liu tiha ona loron 14 nia laran, ne’ebé husi Dili hamutuk nain 1122, no nain 217 husi munisipiu sira. Dadus atual ba moras COVID-19 iha Timor-Leste ba loron ohin mak suspeitu iha nain 229, provavel iha 4, negativu iha 195, hein rezultadu ema nain 12, konfirmadu nain 18.  

“Ba loron ohin ita iha aumenta kazu 10 positivu, tanba ne’e mak ita atraza itoan. Husi kazu konfirmadu 18 ne’e, ida mak rekoperadu. Portantu ita hatene kazu konfirmadu agora iha ema nain 17,” hatete dotora Odete liu husi konferensia imprensa iha Sala Situasaun Sentru Integradu ba Jestaun Krize iha Sentru Konvensaun Dili, Kinta 16 Abril 2020. 

Iha loron Sesta, 10 Abril 2020, rezultadu teste laboratóriu hatudu Timoroan ida positivu infetadu moras virus corona (COVID-19), no tuir fali iha loron Segunda 13 Abril 2020, hatudu tan Timoroan nain 2 positivu, no iha loron Tersa, 14 Abril 2020 hatudu Timoroan nain 2 tan positivu. No iha loron Kuarta 15 Abril 2020, rezultadu teste hatudu timoroan nain 2 tan positivu ona.

Loron Kinta 16 Abril 2020 rezista tan kazu pozitivu foun hamutuk nain 10 husi Hotel-Katuas. Nune’e, total kazu pozitivu iha loron ohin hamutuk ema nain 17 ona mesak Timoroan de’it.

Raimundos Oki
Author: Raimundos OkiWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Xefe Redasaun & Editor

PUBLISIDADE