DILI (TOP) – Joven lubuk ida iha suku Bekora parte mota ulun halo impedementu ba eis komandante em xefe Kay Rala Xanana Gusmão hafoin fila husi fahe apoiu umanitáriu ba komunidade sira iha aldeia Karau Maten.
Observasaun The Oe-Kusi Post (TOP), remata tiha fahe apoiu umanitáriu iha aldeia Karau Maten, suku Ai-Lok, postu Cristo Rei iha oras tuku 6 kalan, ekipa tun ba Dili ona, no hafoin hakur mota ulun Bekora, katuas ida para loos nia motorizada iha estrada klaran hodi impede tiha kareta Kay Rala Xanana Gusmão nian labele liu. Asaun ne’e halo eskoltu sira sente hakfodak tebes, no derepente populasaun sira hakilar hodi dehan Viva…viva Avo Nana, Kay Rala Xanana Gusmão mós tun dadauk husi kareta hodi ba hasoru sira.
Impedimentu daruak iha Bekora mota ulun. Foto The Oe-Kusi Post. Raimundos Oki.
To’o ne’eba, ida ne’ebé para nia motor iha dalan klaran ne’e nu’udar eis xefe aldeia Bekora mota ulun, no aprezenta kedas uma tolu ne’ebe hetan estragus husi inundasaun ne’ebé seidauk hetan apoiu durante ne’e. Nune’e, Xanana mós orienta kedas nia eskoltu sira ba sosa nesesidade báziku hodi fó apoiu imediatu ba feto faluk nain 3 ne’e.
Liu tiha ida ne’e, hafoin hakat tan kuaje metru 100, derepente de’it joven lubuk ida hamrik taka metin estrada ne’e atu sai ba ponte terminal Bekora nian. Joven sira hamrik metin hodi la husik kareta Xanana nian no eskoltu sira atu liu. Nune’e, Xanana tenke tun tan husi kareta, no foin mak tun joven sira, simu ho hakilar viva avo Nana. Tun ba, la seluk la le’et mak joven sira husu atu hasai foto de’it.
Impedementu ikus liu mak foin mak sa’e kareta hodi la’o tan kuaje metru 10 hanesan ne’e, joven lubu ida tan hamrik taka metin estrada ho lala’ok hanesan. Joven sira simu ho viva, no husu hasai foto inklui husu tan bola ida. Impedementu ikus ne’e to’o halo administrador Postu Cristo Rei , Gaspar da Silva mós to’o fatin hodi hasai foto.
“Agora kalan ona, aban mak ha’u lori imi nia bola mai,” hatete Kay Rala Xanana Gusmão ba joven sira iha Bekora mota ulun, Domingu 24 Maiu 2020.
Impedimentu datolu iha Bekora mota ulun. Foto The Oe-Kusi Post. Raimundos Oki.
Author:Raimundos OkiWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
