Oekusipost.com Dili – Bazeia ba dokumentu petisaun ne’ebé rejista ona husi ekipa advogadu sira, deputadu nain 18 husi partidu CNRT no deputada ida husi partidu Uniaun Demokrátika Timorense/Frente-Mudansa mak sai nu’udar autor ka asina ba petisaun ne’e.
Antes ne’e, advogadu Manuel Tilman hateten, deputadu hamutuk nain 18 mak asina petisaun ne’e no temi de’it deputadu sira la mai husi partidu ne’ebé de’it, maibé bazeia ba dokumentu petisaun ne’ebé Oe-Kusi Post asesu, lista naran ne’ebé hakerek iha pájina dahuluk iha ema nain 19, la’ós nain 18.
Notisia relevante: Deputadu Nain 18 Keixa Ona PR Lú Olo ba TR
1.Duarte Nunes
2. Patrocino F. dos Santos
3. Lucia Taeki
4. Maria Fernanda Lay
5. Maria Rosa da Camara “Bi Soi”
6. Maria Terezinha Viegas
7. Gabriel Soares
8. Leandro Lobato
9. Aderito Hugo da Costa
10. Domingos Lopes Lemos
11. Virginia Ana Belo
12. Maria Gorumali Barreto
13. Carmelita Caetano Moniz
14. Veneranda Lemos Martins
15. Ricardo Batista
16. José Virgilio R. Faria
17. Bendita Moniz Magno
18. Francisco D. Xavier Carlos
19. Isabel M.B.F. Ximenes (UDT/FM)
Pájina dokumentu petisaun ne’e mós hakerek de’it autor sira nia identidade, la temi mai husi partidu ne’ebé. Faktu hatudu autor sira ne’e mesak deputadu sira iha Parlamentu Nasionál, no mai husi partidu CNRT.
Petisaun ne’ebé asina husi deputadu Parlamentu Nasionál nain 19 ne’e kona-bá husu ba Tribunal Rekursu atu halo fiskalizasaun ba aktu desijaun Prezidente Repúblika, Francisco Guterres Lú Olo nian durante ne’e tuir de’it Konstituisaun RDTL ka la’e. No tuir advogadu Tilman katak durasaun ba petisaun ne’e durante loron 30 mak Tribunal Rekursu foin fó apresiasaun ka fó sai nia rezultadu.
Notisia relevante: Durasaun Petisaun Kontra PR Lú Olo Iha Loron 30
Prezidente Partidu CNRT, Kay Rala Xanana Gusmäo hateten, petisaun ne’ebé la’ós tanba hare ba Lú Olo, maibé atu defende konstituisaun.
“Ida ne’e prezidente haluhan tiha, maibé, tuir loloos PR mak tenke fó ijemplu ba ami katak Prezidente kumpre konstituisaun hodi ejize mai atu kumpre mós,” Xanana kestiona liu husi konferensia ba imprensa iha sede CNRT bairo Grillos, Dili Kinta 30 Abril 2020.
Nia konsidera PR Lú Olo durante ne’e “selok tun-sa’e” orgaun soberanu sira nia kompeténsia hodi ikus mai to’o hamosu fali krize grave iha instituisaun demokrátiku sira kuaje laiha funsaun ona.
Faktu hatudu, desde inisiu tinan ida ne’e to’o ohin loron Estadu ida ne’e la’ó de’it ho osan duodesimu, laiha Orsamentu Jeral Estadu.
Xanana esplika konteudu husi petisaun ne’ebé sei hatama iha semana oin atu husu ba Tribunal Rekursu hodi halo fiskalizasaun ba aktu no desijaun PR Lú Olo nian durante ne’e.