DILI (TOP) – Organizasaun Mundial ba Saúde (OMS) klarifika katak sira-nia ekipa peritu ne’ebé hala’o prosesu investigasaun ba moras virus corona (Covid-19) nia orijin iha provinsia Wuhan, China ne’e independente, no laiha afiliasaun ba politika saida de’it.
Diretor Jeral OMS Tedros Adhanom Ghebreyesus klarifika konsiderasaun sira ne’ebé ekipa peritu OMS ba Wuhan atu halo investigasaun.
“Dala balun ha’u rona katak ne’e nu’udar estudu ka investigasaun OMS nian. ne’e la’os,” hateten Gebreyesus liu husi konferensia imprensa virtual husi Jenebra ne’ebé The Oe-Kusi Post (TOP) sita husi Xinhua Tersa 16 Fevereiru 2021.
Nia afirma, ne’e nu’udar estudu ida independente ne’ebé kompostu husi individual sira mós independente husi instituisaun 10.
Entretantu, Xefe Ekipa Peritu Internasional iha Wuhan Peter Ben Embarek liu husi konferensia imprensa iha loron Segunda 15 Fevereiru 2021 katak sira nia relatóriu durante investigasaun sei sai nu’udar “dokumentu konsensu”.
“Ekipa internasional no parseiru China sira konkorda ona rezumu relatóriu,” hateten Embarek.
“Ekipa peritu kompostu husi sientista internasional nain 17 no parseiru husi China mós iha nain 17, serbisu hamutuk atu públika relatóriu konjuntu provizoriu, no sira sei halo rekomendasaun ba estudu iha tempu oin mai,” Embarek afirma.
Nia hatutan, presija estudu ida ne’ebé kleur itoan atu “explora hipoteza balun no hasa’e ita-nia koñesementu kona-ba virus ne’e nia orijin”.
Diretor ezekutivu ba Programa Saúde Emergensia OMS Mike Ryan fó hanoin fila-fali kona-ba difikuldade sira atu hetan konsensu kompletu.
“Buka konsensu absoluta iha kada pontu kuaje imposivel iha siensia. Ida ne’ebé ami bele halo maka atinje konkluzaun bazeia ba evidensia iha ami nia-oin,” nia esplika.
Iha semana hirak liuba, ekipa internasional konklui ona sira nia peskiza durante semana ha’at iha Wuhan no aprezenta ona sira-nia rezultadu dahuluk liu husi konferensia ba imprensa iha China hodi hamihis tiha hipoteza katak virus ne’e hahu mosu husi laboratóriu ida iha China.
Fontes OMS katak, oras ne’e ekipa peritu sira hala’o hela rezumu relatóriu ne’ebé planeia atu públika iha semana ne’e nia-laran, no relatóriu ikus nian sei fó sai ba públiku iha semana hirak tuir mai.
