Amérika hahu distribui ona vasina Pfizer millaun 3

DILI (TOP) – Estadus Unidus Amérika (EUA) hahu distribui ona vasina Covid-19 hamutuk millaun tolu ne’ebé dezenvolve husi Pfizer no BionTech hafoin hetan nia lisensa uja emerjensia husi Administrasaun Hahan no Ai-moruk ka Food and Drug Administration (FDA).

Númeru ema ho coronavirus ne’ebé mate iha EUA liu ona 300.000 iha segunda-feira, rekorde doloroso seluk ne’ebé mosu menus husi semana ha’at nia laran hafoin ema mate atinje ona 250.000 iha nasaun ne’e.

Tuir autoridade governu, vasina Covid-19 to’o iha Estadu sira iha loron Segunda, 14 Dezembru 2020.

Jeneral exérsitu Gustave Perna, ne’ebé hola parte iha operasaun Warp Speed katak, kamioneta lubuk ida ne’ebé atu lori vasina Covid-19 husi koreios no FedEx hahu sai ona iha loron Domingu 13 Dezembru 2020.

Sita husi The Associated Press, vasina sira ne’e sei distribui ba sentru distribuisaun hamutuk 150 iha Estadu sira hotu. Sei aumenta tan sentru distribuisaun hamutuk 425 iha loron Tersa 15 Dezembru 2020, no sentru distribuisaun hamutuk 66 sei aumenta iha loron Kuarta 16 Dezembru 2020.

Sandra Lindsay, enfermeira ida husi Sentru Médiku Judaiku iha Long Island, inokuladu ho vasina Covid-19 Pfizer-BioNTech husi dotora Michelle Chester iha Queens, New York, Segunda 14 Dezembru 2020. Foto pixina husi Mark Lennihan. 

Iha konferénsia ba imprensa ida, Perna kompara distribuisaun vasina Covid-19 ho ataka militar Amérika iha funu mundial daruak ka D-Day.

“D-Day nu’udar inisiu husi final no husi ne’eba mak ita agora,” nia hateten.

Distribuisaun vasina Covid-19 Pfizer iha nia obstaklu rasik, tanba vasina ne’e tenke tau (armazena) iha fatin malirin ho 70 grau celsius.
Oras ne’e dadauk (atualmente), Pfizer dezenvolve hela kontainer distributor uja jelu maran no sensor ho abilidade GPS ne’ebé permite kompañia detekta kada distributor no garantia vasina sira nafatin hetan protesaun di’ak.

Ba faze dahuluk, Perna dehan, iha doses vasina Covid-19 millaun 3 haruka ona ba kada Estadu hodi halo vasinasaun imediata. Maske nune’e, seidauk hatene se maka sei hetan sona uluk ho vasinasaun vasina ne’e. Perna dehan, pessoal saúde sira maka sei desidi prioridade sira.

Rede ospital hamutuk 12 ne’ebé iha Portland, MaineHealth fó sai, sira nia parte sei halo vasinasaun dahuluk ba médiku nain 2000, enfermeiru sira inklui grupu risku sira seluk.

Primeiru Ministru Singapura, Lee Hsien Loong/Net.

Entretantu, iha rejiaun Sudeste Aziatiku, Singapura fó ona autorizasaun hodi uja vasina Covid-19 ne’ebé produz husi Pfizer no BioNTech.

Assuntu ne’e hato’o husi Primeiru Ministru Singapura, Lee Hsien Loong liu husi nia diskursu ne’ebé fó sai iha televizaun iha loron Segunda 14 Dezembru 2020.

“Hafoin estuda nia evidensia sientifika no dadus teste klinika sira, Autoridade Siensia Saúde aprova ona vasina Pfizer-BioNTech hodi uja ba pandemia,” Lee hateten nu’udar sita iha ABC News.

Lee dehan, distribuisaun vasina Pfizer ba dahuluk nian sei hala’o iha fulan ida ne’e nia rohan.

“Ami espera vasina seluk sei to’o iha fulan hirak tuir mai. Se buat hotu la’o tuir planu, ami sei iha vasina sufisiente ba ema hotu iha Singapura to’o trimester 2021,” nia garante.

Tuir Lee, vasina ne’e sei fahe gratuita ba sidadaun hotu iha Singapura no rezidente sira ne’ebé hela kleur. Maske programa ne’e ho natureza voluntariu.

Nia mós dehan, vasina ne’e sei fó prioridade ba pessoal saúde sira, frontliner sira, ferik-katuas sira inklui grupu vulnerabel sira seluk.

Membru governu sira ne’ebé tama ona terseira-idade mós sei hetan vasinasaun dahuluk nu’udar demostrasaun ida katak vasina ne’e iha prova seguru.

“Agora vasina disponível ona, ita bele hare ona naroman iha túnel nia tutun,” nia hateten.

“Ita barak liu maka hetan vasinasaun, difisil mós ba virus ne’e atu da’et, no ita seguru liutan nu’udar sosiedade,” nia hateten.

Vasina Covid-19/Net. 

The Oe-Kusi Post (TOP) observa, hafoin pandemia Covid-19 mosu uluk iha sidade Wuhan, China iha Dezembru tinan kotuk, nasaun riku no nasaun poderozu sira hahu ona halo kompetisaun hodi produz vasina atu oinsa bele kura no hapara Covid-19 nia da’et iha mundu, no provas hatudu nasaun poderozu sira hanesan Inglatera, Amérika, Rusia, no China hahu produz ona vasina ne’e, maibé barak liu maka fó prioridade ba ida-idak nia sidadaun sira iha sira nia nasaun laran, no sei fa’an ba nasaun terseiru mundu sira ka nasaun ki’ak no nasaun sira menus dezenvolvimentu ho folin karun.

Nune’e, husi parte Timor-Leste rasik durante ne’e iha ona figura mundial rua no mós nu’udar lider internasional hanesan Kay Rala Xanana Gusmão no laureadu nobel ba paz 1996 José Ramos Horta kontaktu ona nasaun produtor vasina balun iha mundu hodi bele fó vasina gratuita ba nasaun terseiru mundu sira inklui Timor-Leste rasik.

Espera ho sira nia kontaktu Timor-Leste bele hetan tulun vasina gratuita iha tempu ruma.

Horta durante ne’e mós hamutuk ho nia maluk lider mundial sira seluk iha mundu halo kampaña boot no maka’as kona-ba vasina ne’e ho lia-fuan common for good.

Figura mundial rua ne’e (Xanana-Horta) ho sira nia kapasidade no infuensia informal antes ne’e mós husu ona fasilidade prevensaun Covid-19 husi nasaun balun hodi ajuda Timor-Leste bele luta hasoru Covid-19. No rezultadu oras ne’e dadauk hatudu, seidauk rezista Timoroan ida mate iha rai-laran tanba kona Covid-19.

Raimundos Oki
Author: Raimundos OkiWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Xefe Redasaun & Editor

PUBLISIDADE