Oekusipost.com Dili – Sidadaun Estadu Unidus Amerika (EUA) besik nain 14 sai ona (repatria) husi Timor-Leste iha loron 12 Abril 2020, tanba impaktu global husi moras virus corona (COVID-19).
Tuir komunikadu imprensa ne’ebé Oe-Kusi Post asesu katak, Ministériu Negosiu Enstranjeiru EUA no Embaixada Estadus Unidus iha Timor-Leste laiha tan prioridade boot seluk alem seguransa ba sidadaun EUA nian ne’ebé hela iha nasaun seluk. Tanba limitasaun opsaun viajen komersial, fim da semana ne’e, ami disponibiliza voo espesial ida ba sidadaun EUA no residente permanente legal EUA nian sira ne’ebé hakarak sai husi Timor-Leste.
Iha loron 19 Marsu 2020, Ministériu Negosiu Estranjeiru EUA nian sujere sidadaun EUA sira atu evita viajen internasional sira tanba impaktu global husi COVID-19.
Embaixada EUA iha Dili kontinua nia operasaun ho asaun prevensaun tuir governu Timor-Leste nia Estadu Emerjensia no kontinua iha komitmentu atu apoia Timor-Leste hodi hasoru desafiu COVID-19 nian.
Iha loron Abril 9, Embaixadora Fitzpatrick anunsia ona katak Estadus Unidus liu husi nia Ajensia ba Dezenvolvimentu Internasional (USAID) iha komitmentu atu oferese millaun $1.1 hodi tulun governu Timor-Leste luta kontra COVID-19.
Tuir dadus ne’ebé iha katak ema hamutuk nain 883 mak oras ne’e tuir hela konfianamentu obrigatóriu kuarentena. Iha Dili hamutuk nain 746, no iha munisipiu sira hamutuk 120. Husi dadus ne’e iha ema hamutuk nain 17 mak halo auto-kuarentena ne’ebé kompostu Dili iha nain 4, no iha munisipiu hamutuk nain 13.
Entretantu husi total 883, rejista ema hamutuk nain 64 mak oras ne’e sai suspeitu, nain 12 mak provavél, nain 50 mak negativu (livre husi COVID-19), kazu pozitiu nain 2, nain ida rekoopera (di’ak) fali ona, no iha kazu foun ida ne’ebé oras ne’e tuir hela tratamentu intensivu iha Sentru Saúde Vera Cruz, Dili.
