DILI (TOP) – Grupu emprezariu Portugues sira ne’ebé “uja no hafalun a’an ho bandeira” Ensul Engenharia, S.A. konsege explora no goja duni rai Colmera hodi hetan benefisiu fiskal ba sira nia a’an, maibé desde 16 Abril 2020 to’o ohin loron deskonfia seidauk selu rai-ten ba Estadu Timor-Leste.
Iha loron 16 Abril 2010, Ministru ba Ekonómia no Dezenvolvimentu (MED) João Mendes Goncalves husi Partidu Sosial Demokrata (PSD) reprezenta kuartu governu konstitusional selebra akordu espesial investimentu ho kompañia Ensul Meci-Gestão de Projectos de Engenharia, S.A. hodi entrega tiha rai Colmera ba kompañia ne’e ba tinan 99 hodi halo investimentu, maibé la kleur de’it kompañia ne’e mate tiha ona iha Portugal, maibé ikus mai moris hias fali iha Colmera ho naran Ensul Engenharia, S.A.
Notisia relevante: Hakoi iha Portugal, moris hias iha Colmera
Maske moris hias iha Colmera mós eis Prezidente Ajensia Espesializada ba Investimentu Felizberto Araújo Duarte (Tony) konsidera Ensul la’os ona nu’udar investor, tanba kompañia ne’e mate tiha ona, no durante tinan 10 ona mós foin maka harii uma ida ho andar 16 ne’ebé to’o oras ne’e mós seidauk hotu.
Tuir dokumentu akordu espesial investimentu entre governu Timor-Leste ho Ensul Meci-Gestão de Projectos de Engenharia, S.A ne’ebé The Oe-Kusi Post (TOP) asesu katak, Ensul tenke selu ona taxa ba Estadu Timor-Leste iha loron 16 Abril 2020, maibé Ministru Justisa, Manuel Carceres katak to’o ohin loron kompañia ne’e seidauk selu buat ida, tanba seidauk iha kontratu subarendamentu ho nia ministériu rasik.
Tanba saida maka durante tinan 10 ona seidauk iha akordu de arendamentu?
Eis Diretor Nasionál Terras Propriedade no Serbisu Kadastrais iha kuartu governu konstitusional António Verdial ho diplomasia esplika, nia laiha koñesimentu kona-ba akordu espesial investimentu ne’ebé governu halo ho kompañia Ensul.
“Diresaun Nasionál Terras no Propriedade rona de’it informasaun dehan katak akordu ne’e halo ba tinan 50,” hateten António Verdial ba TOP iha Parlamentu Nasionál, Kinta 7 Janeiru 2020.
Deputadu husi partidu KHUNTO ne’e esplika, akordu espesial investimentu ne’ebé halo tiha tinan 10 liuba la’os Ministériu Justisa de’it maka halo, maibé interministerial sira hanesan Ministériu Ekonómia ba Dezenvolvimentu (MED) ho Ministériu Justisa.
Ministériu rua ne’e inklui Ministériu Negósiu Estranjeiru no Kooperasaun (MNEK) lidera husi figura sira mai husi Partid u Sosial Demokrata (PSD), no Verdial mós nia orijin ne’e mai husi partidu ne’e rasik molok tama fali ba partidu KHUNTO.
Prezidente Komisaun G Parlamentu Nasionál katak, depois mudansa estrutura governu husi kuartu governu mai to’o ohin loron nia nu’udar oan deputadu husi partidu KHUNTO.
“Ha’u rona de’it, akompaña de’it, maibé ha’u atu hateten de’it hanesan deputadu ha’u sei la ultra-pasa serbisu sira ne’ebé governu halo,” nia afirma.
Tanba saida maka iha tempu ne’eba la halo kedas kontratu de arendamentu ho Ensul, Verdial esplika nia serbisu iha tempu ne’eba hare liu ba aspetu tekniku, maibé oras ne’e nia hakarak parte kompetente tenke regulariza Ensul hodi kumpri lei no kumpri akordu investimentu ne’ebé liu tiha ona tinan 10.
“Hanesan sidadaun Timor-Leste no agora nu’udar deputadu ha’u hatete de’it, di’ak liu regulariza”.
Kona-ba assuntu kontratu arendamentu, TOP esforsu ona husu komentariu husi eis Ministra Justisa Lucia Lobato, maibé lahetan resposta.
