Oekusipost.com Dili — Proposta adisionál ho montante millaun $100 hanesan rezervadu hodi hasoru Coronavirus Disease 2019 (CorVid-19).
“Banku Sentrál Timor-Leste ho Ministériu Finansa mak pronunsia, katak di’akliu mk ita halo pedidu levantamentu adisionál tán ba Banku Federál Amérika hodi transfere ka transporta osan ne mai banku sentrál nu’udar rezerva de’it, tanba iha Amérika mós aplika ona lockdown, sei la fasil atu transporta osan mai Timor-Leste tuir períodu normál nian,” Vise-Prezidente Parlamentu Nasionál, Maria Angelina Sarmento ba jornalista sira iha Sentru Konvensaun Dili (SKD), Domingu 29 Marsu 2020.
Membru Komisaun C ne’ebé responsavél ba finansa públika ne’e esplika, osan millaun $100 ne’e nu’udar rezerva ba Timor-Leste bainhira hasoru situasasaun defísil CorVid-19.
“Kuandu Timor-Leste presiza urjenti, ita la presiza rekere ona ba banku iha Amérika, más osan rezerva iha ona Timor-Leste no la difikulta ona prosesu,” esplika deputada husi Partidu Libertasaun Popular (PLP) ne’e.
Nia konsidera proposta adisionál governu hosi governu ne’e nesesáriu atu halo reforsu ba kofre estadu.
“Prinsipalmente ho situasaun urjente hanesan agora, no liuliu tanba mundu hotu ameasa ho virus globál ida-ne’e no halo lockdown iha fatin hotu liuliu iha Estadu Unida Amérika (EUA)”, dehan nia.
Nia afirma, pedidu atu halo levantamentu ba fundu petrolíferu ba Parlamentu Nasionál ho karáter urjénsia, ho totál millaun $ 250 ne’e nia objetivu mak atu halo reforsu ba kofre estadu ba fulan-Abríl bá-oin hodi finánsia mákina estadu liuhosi orsamentu duodésimu, tanba Timor-Leste seidauk iha Orsamentu Jerál Estadu (OJE).
“Orsamentu millaun $250 ne’e seidauk prevé nesesidade sira hanesan kombate no prevene COVID- 19, inundasaun no estadu emerjénsia, tanba montante ne’ebé governu sei gasta iha fulan hirak tuir-mai ne’e, sei bazeia de’it ba rejime duodesimál artigu 31 hosi Lei Orsamentu no Jestaun Finanseira (LOGF). Katak kuandu orsamentu jerál ida seidauk iha, uza osan duodesimu ne’e bazeia ba montante hosi orsamentu tinan anteriór nian mak fahe ba fulan 12”, esplika membru Komisaun Finansa Públika ne’e.
Nia esplika, pediu levantamentu no proposta adisionál ne’e sei debate iha faze jeneralidade no espesialidade sei halo loron ida de’it, iha segunda-feira lokraik. Nune’e mós sei aplika loron ida de’it hodi halo debate no aprovasaun final globál.
Entretantu, Ministériu Finansas (MF) propoin proposta orsamentu adisionál millaun $100 ba Parlamentu Nasionál hodi antesipa despeza ba COVID-19.
“Pedidu levantamentu ne’e hamutuk millaun $250 mas momentu ne’ebá ha’u mós husu halo montante adisionál millaun $100 hodi antesipa kedas despeza sira ba COVID-19, karik COVID-19 ne’e afeta ema maka’as entaun presiza mós intervensaun ekonomia. Ha’u husu tán millaun $100 ba Parlamentu Nasionál, horisehik”, Ministra Finansas Ein-Ezersísiu, Sara Lobo Brites.
Pedidu adisionál ne’e Ministra Finanas ne’e husu ona Komisaun C (Finansas Públika) no Komisaun C husu husu aprezenta ho detalla katak millaun $ 100 atu uza ba saida de’it.
