Oekusipost.com Dili – Governu liu husi Ministériu Koordenador ba asuntu Ekonómia (MEKAE), orienta nafatin kompañia internasional Pelican Paradise atu kontinua hala'o obra iha área Tasi-Tolu, Komoro Dili.
"Ha'u hasoru kala dala lima ka dala neen ona, no ami rasik orienta ba iha akordu investimentu sira," hatete Ministru Interinu Koordenador ba asuntu Ekonómia, Fidelis Leite Magalhães ba jornalista sira hafoin reniaun Konsellu Ministru iha Palasiu governu, Kuarta 04 Marsu 2020.
"Ita boot sira hatene katak, agora Pelican Paradise halo dadaun ona ninia obra iha Tasi-Tolu, depois seluk sei avansa iha futuru bainhira ita kompleta akordu investimentu," hatutan governante ne'e.
Governante mai husi Partidu Libertasaun Popular (PLP) ne’e dehan, tuir proposta ne'ebé iha, diskusaun kona-bá populasaun sira ne'ebé hela iha Tasi-Tolu ne'e sei la'o tuir faze.
"Faze ne'e la'os ita avansa hotu kedan, maibé fatin sira ne'ebé mamuk ita bele avansa dadauk ona," hatutan Fidelis.
Kona-bá fatin sira ne'ebé populasaun sira sei okupa hela ne'e, tuir Bobonaro oan ne’e katak governu sei buka meius hodi bele konvense populasaun sira atu muda sira ba fatin seluk. Tanba ne'e, obra bele hahu ona husi fatin ne'ebé mak mamuk, maibé iha tempu badak governu sei konvensa populasaun sira atu nune'e bele muda ba fatin seluk. (*)
