Oekusipost.com – Virus Corona oras ne’e la’ós ona nu’udar problema domestika Repúbliak Popular Xina nian. maibé nakfila ona nu’udar problema global ne’ebé presija tebes asaun global ida atu bele rezolve.
Nasaun barak iha mundu oras ne’e preokupa maka’as kona-bá virus ne’e, no inklui iha Timor-Leste mós preokupa maka’as no mosu ona asaun kontra hasoru planu governu nian atu buka hela fatin ba izolamentu nian.
Dadus husi Organizasaun Mundial ba Saúde (OMS) hatudu, ema hamutuk nain 100.000 mak mate ona iha mundu no lubuk ida mak oras ne’e sofre hela.
"Iha nível globál, deteta ona kazu konfirmadu por volta rihun atus ida, no akontese iha nasaun atus ida resin", reprezentante OMS iha Timor Leste, Rajesh Pandav hatete ba jornalista sira hafoin informa ba Prezidente Repúblika, Francisco Guterres Lu Olo iha palásiu prezidensial iha Ai-Tarak Laran, Dili Segunda 9 Marsu 2020.
Rajesh hatutan, husi kazu sira ne’e, rejista 80.000 resin iha Repúblika Populár Xina no rihun rua nulu resin iha nasaun seluk.
"Husi númeru sira ne’e, ema kuaze 3000 iha Xina no 400 husi nasaun sira seluk. Nune’e taxa mortalidade ba COVID-19, pursentu 3.4.
Kona-ba Timor Leste, tuir Rajesh katak, to'o ohin loron seidauk konfirma moras ne’e maske iha ona suspeitu ida, maibé nafatin husu ba sidadaun tomak iha rai laran atu kontinua koidadu a’an hanesan tenke fase liman moos hodi evita a’an husi moras ne’e.
Nia esplika, métodu sira ne'ebé uza hodi deteta kazu virus corona mak hanesan, hakbesik aan ba sentru saúde sira bainhira moras, buka tuir ema sira ne’ebé besik ba ema moras, oferese treinamentu rutina ba pesoál saúde no prepara fatin izolamentu (karantina). (*)
