DILI (TOP) — Diretór Departamentu Nasionál Tránzitu no Seguransa Rodaviária (DNTSR), Superintendente Polísia João Belo husu ona ba sidadaun sira ne’ebé iha transporte hanesan kareta-motor maka laiha dokumemtu kompletu, di’ak liu hamanas iha uma de'it. Labele lori sai ba halo barullu iha estrada públiku, tanba ne'e viola regra tranzitu sira.
Nia hatutan, polisia bandu adeptu (suporter bola) ba nasaun sira ne’ebé maka partisipa iha joga taxa Euro 2021 atu labele halo barullu ho sira nia transporte sira iha estrada públiku sira hafoin joga remata.
“Primeiru pontu atu fó hanoin ba adeptus (suporter bola) ba nasaun ne’ebé mak joga iha Taxa Europeia, tenki respeita ema seluk nia movimentu i depois pontu segundu kumpre mós lei ne’ebé iha liuliu kodígu estrada tanba iha loron hirak liubá adeptus sira tu’un ba estrada viola lei barak nune’e barak mak ami kaer,” hateten comandante João Belo liu husi konferénsia ba imprensa iha kuartel jeral PNTL, Kaikoli, Dili Sesta 18 Juñu 2021.
Nia husu nafatin ba sidadaun liuliu suporte bola atu nafatin kumpre nafatin lei tránzitu ne’ebé estabelese ona bainhira viola maka polísia iha direitu tomak halo atuasaun ida mais rigorozu ba sé de’it.
“Uza oportunidade (konferensia imprensa) ne’e hakarak hato’o ba maluk sira katak kódigu estrada ne’ebé mak ami (polísia) uza hodi regulariza maluk sira ne’ebé halo movimentu. Primeiru kona-ba liberdade ba tránzitu rodaviária nian, sira ne’ebé uza motor no karreta wainhira tu’un iha estrada tenki respeitu liberdade ema seluk nian tanba estrada ne’e estrada públiku laós ema ka grupu ida nian,” nia afirma.
“Segundu kona-ba órden autoridade, suporter bola tenki kumpre órden ne’ebé polísia hato’o ba sira. Terseiru tenki kumpri mós sínais sira ne’ebé marka ona, ijemplu labele kontra diresaun ka jalur, labele para iha kruzamentu no bainhira uza motorizada tenki tau kapasete, ne’e rekezitu ne’ebé ami ejize ba adeptu sira.”
“Artigu 8 hosi kódigu estrada manifestasaun ka uza dalan públiku ba grupu tenki iha lisensa depois (polísia) autoriza mak sira foin halo (pawai) sé la iha ida ne’e (karta autorizasaun) ami sei atua,” nia ameasa.
Alende ne’e nia mós apela ba suporter bola kuidadu hodi labele uza kanu resin, tanba hahalok ida ne’e viola ema seluk nia direitu, bainhira ida ne’e akontese maka polísia nia papél prontu halo atuasaun ida mais rigorozu bazeia ba lei tránzitu ne’ebé estabelese iha ita rain.
“Maluk sira ne’ebé uza motorizada iha tempu pawai tenki kumpre nafatin kódigu estrada liuliu artigu 74 katak motorizada ne’e tenki uza kanu standart (kanu baibain) labele kanu resin. Tanba uza kanu resin sai hosi bairru ida ninia impaktu ba ema sira ne’ebé oan nurak, moras no ema hakarak deskansa ita viola tiha sira nia direitu, tanba ne’e mak polísia tránzitu la autoriza motorista sira uza kanu resin halo movimentu iha estrada públiku, no artigu 75 kona-ba kódigu estrada ninian ko’alia mós wainhira uza karreta ka motor labele konsumu álkohol (tua).”
Nia akresenta, hodi reforsa artigu sira ne’ebé sita iha leten, maka kódigu penál mós bandu bainhira kondús karreta ka motor tenki iha karta kondusaun, tanba karta kondusaun hanesan baze fundamentu hodi fortifika katak ema ne’e bele kondús transporte iha estrada públiku.
“Sé la iha karta kondusaun motor karreta iha di’ak liu hamanas de’it iha uma labele lori mai estrada públiku, sé uza mai estrada públiku polísia tránzitu sei atua i sei regulariza tuir lei ne’ebé mak iha,” Superintendente João fó hanoin.
Ikus nia dehan, komandu PNTL sei koloka membru hotu iha estrada públiku liu-liu fatin sira ne’ebé identifikadu risku hodi limita movimentu ne’ebé la nesesariu no fó ameasa ba ema seluk nia moris.
