DILI (TOP) — Polisia Nasionál Timor-Leste tuir konstituisaun RDTL artigu 147 katak polisia sei defende legalidade demokrátiku no garante sidadaun sira-nia seguransa internu, maibé sira labele iha partidu polítiku, prevensaun kriminál tenke hala’o ho respeitu ba direitus umanus, no FALINTIL-Forsa Defeza Timor-Leste iha artigu 146 katak, garante independénsia nasionál, integridade territoriál, liberdade no populasaun nia seguransa hasoru agresaun ruma ka ameasa externa, ho respeitu ba orden konstitusionál.
Artigu 147 husi konstituisaun RDTL ne’e define klaru, PNTL maka tau matan ba seguransa interna ka seguransa iha rai-laran, no F-FDTL maka tau matan ba ameasa seguransa husi rai liur.
Nune’e, Prezidente Komisaun B Parlamentu Nasionál ne’ebé trata asuntu Seguransa, Defeza no Negósiu Estranjeiru, José Agostinho Sequeira ‘Somotxo’ husu ba Ministru Interior, Taur Matan Ruak labele hanoin atu halo estatutu PNTL nian hanesan ho F-FDTL.
“Alerta ba ministériu interiór para labele dehan PNTL nia estatutu ne’e atu sai hanesan estatutu militar nian, militár ne’e diferente, polísia ne’e diferente,” deputadu Somotxo hateten ba jornalista sira iha Parlamentu Nasionál, Dili, Tersa 15 Juñu 2021.
Deputadu husi bankada FRETILIN ne’e esplika, estatutu PNTL la’ós foin maka hahu ko’alia maibé desde uluk kedas ko’alia tiha ona.
To’o agora seidauk iha maka ita labele hakfodak kuandu públiku konsidera hanesan sívil. Hanesan sívil halo parte administrasaun publika ne’e sim, maibé ninia karakteristika ne’e la hanesan tanba polísia uza kilat ho responsabilidade kompeténsia la hanesan funsaun publika (funsionariu baibain). Tanba ne’e mak estatutu PNTL ne’e importante tebes, liu husi estatutu ne’e mak bele fó dalan ba polísia nia rezime no dekretu balun tanba ida ne’e (estatutu) hanesan biblia ka hun ba funsionamentu instituisaun, lei sira tuir mai tenki bazeia ba estatutu. Maibé to’o ohin loron seidauk iha,” nia hateten.
Nia konta nia esperiensia antes ne’e nu’udar Ministru Defeza no Seguransa durante fulan 9 iha governu minoritária ne’ebé lidera husi Primeiru-Ministru, Mari Alkatiri iha tinan 2017 hatene klean tebes kona-ba assuntu ne’e.
