DILI (TOP) – Prezidente Comisão Politica Nacional (CPN) partidu CNRT, Kay Rala Xanana Gusmão kumpri ona notifikasaun Ministériu Públiku nian hodi ba hato’o nia deklarasaun kona-ba keixa ne’ebé aprezenta husi Sekretariu Jeral partidu FRETILIN, Mari Alkatiri iha fulan hirak liu-ba.
Tuir informasaun balun ne’ebé The Oekusi Post (TOP) asesu husi fonte ofisial ida katak, hafoin Xanana tama hasoru prokurador titular ka prokurador ne’ebé responsabiliza ka’er prosesu (kazu) ne’e, nia husu ba Ministériu Públiku atu notifika nia nu’udar arguidu hodi bele ba hatan to’o iha Tribunal, tanba públikasaun estrutura partidu CNRT nian kona-ba alegasaun subornu husi empreza ConocoPhilips ba eis Primeiru-Ministru Mari Alkatiri ne’e hetan orientasaun husi Prezidente CPN partidu CNRT atual eis Primeiru-Ministru, Kay Rala Xanana Gusmão.
“Katuas oan ne’e husu ba Prokurador titular atu notifika nia nu’udar arguido, tanba nia iha koñesementu no nia duni maka haruka estrutura CPN CNRT nian hodi halo públikasaun ne’e,” hateten fonte ofisial ida ne’ebé besik Xanana ba TOP iha edifisiu Prokuradoria Jeral Repúblika (PJR), Kolmera, Dili, Segunda 29 Marsu 2021.
Fonte ne’e hatutan, Prezidente CPN CNRT, Kay Rala Xanana Gusmã maka haruka estrutura CPN sira hodi públika alegasaun kazu subornu osan millaun $2.5 ne’ebé ConocoPhillips selu ba Mari Alkatiri ne’e ba media sira.
“Desijaun públika ne’e desijaun kolejial, entaun ninia responsabilidade mós kolejia”, fonte ofisial ne’e afirma.
Prezidente partidu CNRT, Kay Rala Xanana Gusmão mós antes ne’e planeia ona atu halo konferensia ba imprensa hafoin presta deklarasaun iha Ministériu Públiku, maibé lakonsege no seidauk halo, tanba ema barak loos maka ba hamrik iha edifisiu PJR nia oin, no ema sira ne’e fó viva temi nia naran bainhira nia sai husi edifisiu PJR.
“Nia lakohi halo, tanba nia lakohi ema barak hanesan ne’e, no orsida ema kontinua akuza nia katak nia maka organiza sasan sira ne’e hotu. Ida fali tanba agora ita iha hela periodu Serka Sanitária ne’ebé proibidu ka bandu ema labele halibur malu to’o nain 10 resin. Katuas kumpri hela ida ne’e maka ohin nia lakohi halo konferensia ba imprensa ne’e” esplika fonte ofisial ne’e.
Antes ne’e, bankada CNRT iha Parlamentu Nasionál ezije ba Ministériu Públiku atu aselera kazu Subornu Millaun $2.5 ne’ebe ConocoPhillips selu ba Mari Alkatiri. CNRT nia seriedade ne’e hato’o liuhosi deklarasaun politika ne’ebé bankada CNRT hato’o iha Plenaria Parlamentu Nasional (PN) iha tempu hirak liu-ba.
Antes ne’e Membru CPN na’in 7 hatan ona investigasaun no hetan ona Termo Identidade Residencia (TIR).
Prezidente CPN-CNRT rasik hakerek ona karta ba PJR-Jose Ximenes hodi husu atu MP notifika lalais Maun Bot Xanana. MB Xanana informa ba MP katak asaun hotu-hotu ne’ebe CPN-CNRT no Bankada CNRT foti ne’e, responsabilidade Maun Bot Xanana nudar Prezidente Partidu no Prezidente CPN-CNRT.
Prezidente CNRT, Kay Rala Xanana Gusmão prontu no preparadu atu aprezenta evidensia kona-ba Subornu ne’ebé Mari Alkatiri simu husi ConocoPhilips iha 2003-2004.
Mari Alkatiri halo keixa denunsia kalunioza hasoru CPN-CNRT no Bankada CNRT iha fulan Juñu 2020, no MP aplika ona TIR ba membru CPN-CNRT na’in 7 maibe prosesu ne’e malirin no lao neineik liu.
Kazu ne’e provoka husi deklarasaun Sekretariu Jeral partidu FRETILIN, Mari Alkatiri nian liu husi nia konta Facebook iha loron 21 no loron 22, fulan Juñu, tinan 2020.
Lia-menon loron ohin nian: "korupsaun ne'e moras ida hanesan virus ativu ida ne’ebé hadaet lais tebes. Ema sira ne'ebe hala'o korupsaun wainhira atu subar no proteje sira nia an, sira uza asaun trickle -down karii osan restu ka buat KiIK ba ema vulneravel sira atu hatudu dehan sira solidaredade ba ema seluk (filantropia) Ka soe rai rahun oema nia matan (mobiliza media) bainnhira sira fo buat ruma ba Kiak Sira atu hatudu Denan halo Sira halo Kandade, (21 de junho de 2020).
"Balun, tanba poder, uluk sai heroi, agora sai koruptor boot, no habelar korupsaun ba Povu tomak nia leet. (22 de Junho de 2020).
Ho deklarasaun ne’e maka, mosu reasaun husi militantes Partidu CNRT nian, maka CPN halo reuniaun iha loron 22 fulan Juñu 2020, hodi hasai ninia deklarasaun ba imprensa, nudar resposta ba Sekretariu Jeral partidu FRETILIN, Mari Alkatiri.
Deklarasaun ne’e, se assina husi Vice-Presidente CPN. Virgilio Simith, maibé Prezidente CPN rasik, Kay Rala xanana Gusmão maka dirije reuniaun ne’e.
Ba fali loron 6 Novembru 2020, Mari Alkatiri hakat ba Ministériu Públiku hodi aprezenta keixa kontra membru CPN no bankada Parlamentar CNRT.
