Oekusipost Dili – Maske Timor-Leste oras ne’e hasoru hela dezastre global mak Coronavirus Disease 2019 (CorVid-19), no dezastre domestika ba inundasaun iha Dili laran, maibé partidu koaligasaun maioria no koaligasaun minoria la kolen buka dalan hodi buka kadeira no poder.
Koaligasaun minoria entre partidu FRETILIN ho Partidu Libertasaun Popular (PLP) ne’ebé hala’o iha Hotel-Timor iha loron Sábadu, 21 Marsu liuba ho intensaun ida prontu atu forma governu bainhira Prezidente Repúblika (PR), Francisco Guterres Lu Olo nia desijaun afavór ba koaligasaun minoria ne’e.
Durante asina plataforma intendimentu koaligasaun minoria ne’e, Sekretariu Jeral Partidu FRETILIN, Mari Alkatiri hatete, plataforma intendimentu ne’e sei hetan mós apoiu husi deputadu balun iha Parlamentu Nasionál, maibé portavoz partidu koaligasaun Aliansa Maioria Parlamentar (AMP) foun, António da Conceição (Kalohan) konsidera deklarasaun ne’e nu’udar tentativa ida hodi loke dalan atu forma governu minoria hanesan iha tinan 2017 ne’ebé iksu mai tenke monu to’o hakdasak, no mós nu’udar tentativa ida hodi sobu koaligasaun AMP nian.
“Tuir Lei Eleitoral ba PN iha Artigu 16 kona-bá lakon mandatu katak, deputadu eleitu ba PN iha lista ne’ebé aprezenta husi partidu politika ka koaligasaun partidariu, la’ós pessoal. Nune’e, bainhira deputadu AMP ida mak la halo tuir sei aplika lei ne’e no lakon nia mandatu nu’udar deputadu iha PN,” hatete Kalohan liu husi konferensia ba imprensa iha sede partidu CNRT, Bairu Grilos, Dili Tersa, 24 Marsu 2020.
Entrentantu, entre SekJen FRETILIN, Mari Alkatiri no Prezidente PLP atual Primeiru-Ministru, Taur Matan Ruak kompromete katak intendimentu plata forma entre FRETILIN ho PLP ne’e prontu hodi forma governu foun bainhira hetan aprovasaun husi PR.
