GROTU (TOP) – Relatóriu Organizasaun ba Kooperasaun Economic no Dezenvolvimentu ne’ebé públika iha loron 17 Setembru 2020 katak, Timor-Leste sai ona husi estatutu Estadu Frájil maibé, eis Komandante em Chefe das FALINTIL, Kay Rala Xanana Gusmao dúvida ho relatóriu ne’e, tanba tuir Xanana katak, konteudu husi relatóriu la kondis ho realidade atual ne’ebé oras ne’e akontese iha Timor-Leste.
“Kona-ba ida ne’e, ha’u labele dehan katak sai tiha ona, tanba frazilidade ne’e ita haree iha konstrusaun Estadu nian, no konstrusaun nasaun. Konstrusaun Estadu se ai-rin ha’at Estadu nian metin nafatin, entaun ita dehan katak sai tiha ona husi frazilidade, maibé se ai-rin ha’at ne’e hanesan Prezidensia, Parlamentu, Governu no Tribunal sira maka nakdoko hela, entaun ita sei frazil,” hateten Xanana iha suku Gruto, postu Same, munisipiu Manufahi, Tersa 22 Setembru 2020.
Xanana esplika kona-ba estabilidade seguransa ne’ebé durante ne’e Timor-Leste iha, tanba mai husi konsiensia povu tomak, no ba fali estabilidade politika mós tanba tuir konsiensia politika povu ninian.
Nia hatutan, povu la baku malu, tanba ita iha 2006-2007 ita iha ona esperiensia ida, ita oho malu depois tinan 24 ita hetan mate barak, tanba ne’e mak hasai lia-fuan dehan adeus konflitu, bem vindo dezenvolvimentu ho ida ne’e mak kria konsiensia foun ida dehan katak buka rezolve buat tuir dalan dialogu ho pasiensia hodi labele mosu tan krize.
“Tanba ita maka estraga aan rasik, ne’e mosu iha 2008-2009 bainhira ita resolve tiha ita nia krize ne’e ita hatutan, iha ne’e ha’u konkorda katak ita nia populasaun dehan se iha buat ruma atu rezolve, bele rezolve, maibé labele liu husi dalan konflitu,” esplika Xanana.
