DILI (TOP) – Primeiru-Ministru (PM), Kay Rala Xanana Gusmão tun direta no fó orientasaun hodi taka jogu Grand Dragon Lotaria ne’ebé lokaliza iha Praia dos Coqueiros, Dili, iha loron Kinta, 04 Dezembru 2025.
Prezensa Primeiru-Ministru nian iha terrenu tanba durante debate Projetu Proposta Lei (PPL) no.23/VI (3a) kona-bá Orsamentu Jerál Estadu (OJE) tinan fiskál 2026 iha Parlamentu Nasionál (PN) simu lia-fuan mafiozu, tanba Governu husik jogu online kontinua eziste. Ho ida-ne’e mak Governu halo tiha rezolusaun hodi taka jogu online ne’e, maibé ema sei joga nafatin.
“Ha’u mak responsável ba Serbisu Nasionál Intelejénsia (SNI) no Polisia Sientifika Investigasaun Kriminal (PSIK). Sira ne’e iha ha’u nia okos hodi hatan ba problema sira ne’ebé sosiedade hasai iha Parlamentu lor-loron de’it dehan ha’u mak mafiozu boot, ema lakon osan barak. Tanba ida ne’e mak mai haree katak, iha ne’e sei joga nafatin,” PM Xanana hateten.
Xefe Governu haree katak, ema sira ne’ebé loke jogu sira ne’e iha ligasaun direta ho Indonézia, Rúsia, Brazíl, Europa. Tanba ne’e maka Polísia mai iha ne’e dezliga de’it maibé iha rezolusaun Governu nian ne’ebé publika ikus ne’e dehan katak sobu.
“Ha’u mai kedan iha ne’e atu fó hanoin ba hotu-hotu katak, iha desizaun dehan taka la taka mak deskobre sobu hotu, ida ne’e husi SNI no PSIK. Ha’u ba Prokuradoria Jerál Repúblika, maibé sira la book aan, serbisu kala barak tebtebes tanba ne’e mak ha’u rasik mai. Nu’udar Xefe Governu ba iha Parlamentu Nasionál ha’u rona lia-fuan barak tebtebes, ha’u sente katak tenke iha desizaun urjente no lalais,” esplika PM Xanana.
Diresaun Servisu Investigasaun Kriminál (DSIK) iha Kuarta, 03 Dezembru 2025, ezekuta mandadu hosi Ministériu Públiku (MP) halo buska no apreensaun bá jogu Lotaria Grand Dragon neʼebé lokaliza iha Praia dos Coqueiros no mós nia sukursál iha Timor Plaza.
Iha prosesu buska no apreensaun ne'e, PNTL lidera hosi Komandante Operasaun Superintendente Asistente Polísia Mouzinho Tavares Correia, asegura prova ka evidénsia sira, hanesan telemovel 15, kumputadór 10-resin, pasaporte, kupon ho osan kuaze millaun $1 iha brankas, inklui halo identifikasaun bá traballadór balun no halo detensaun bá jerente na'in-tolu.
Ezekusaun bá buska ne'e hetan mandatu hosi Ministériu Públiku liu-hosi Prokuradór João Marques ho Númeru Uniku Kriminál (NUC) 0389/2025.PNSIC.
Grand Dragon Lotaria Estadu Timor-Leste liu-hosi VIII Governu Konstitusionál mak loke no legaliza iha tinan 2022.
