DILI (TOP) – Parlamentu Nasionál hahu hala’o ona semináriu ida ne’ebé konvida matenek nain sira kona-ba lei atu oinsa tau hamutuk hanoin molok to’o faze halo revizaun ba Konstituisaun Repúblika Demokrátika Timor-Leste (K-RDTL).
Prezidente Parlamentu Nasionál, Maria Fernanda Lay, akompña husi Vise no Deputadu sira, ofisialmente hala’o abertura ba semináriu ho tema “Revizaun Konstituisaun Republika Demokratika Timor-Leste (KRDTL)” iha loron 3 fulan dezembru tinan 2025, iha Sala Konferensia Ministeriu Finansas nian.
Iha diskursu abertura, Prezidente Parlamentu Nasionál, Maria Fernanda Lay hateten, obra perfeita la existe, maibé bainhira ko’alia kona-ba muda texto Konstituisaun nian tenke iha serteza duni katak, mudansa ne’e atu halo textu sai di’ak liu tan.
Nia hatutan, revizaun Konstitusional ida nunka bele halo hanessan exersísiu ba experimentasaun polítika, labele halo ho hanoin “hodi koko to’ok de’it”. Kuandu halo revizaun tem que hanoin barak uluk, fundamentasaun ba alterasaun tem que metin, no tem que iha garantia katak mudansa sira sai nu’udar aperfeisoamentu tebes.
Semináriu ida ne’e ho hanoin ida atu aborda hotu hanoin husi perspetiva peritus juridiku, politiku, sosiadade sivil, akadémiku, relijiaun no seluk tan, hafoin bele halo analiza klean oportunu duni ka seidauk? Alénde ne’e, sai mos materias kritiku importante sira ba lejislador sira atu tau prioridade sira hodi bele ezerse funsaun tuir lei haruka.
Hafoin de abertura, atividade ne’e kontinua ho aprezentasaun husi orador sira hanesan, Prof. Dr. Pedro Carlos da Silva de Bacelar Vasconcelos, Dra. Lúcia Maria Brandão Freitas Lobato, no Dr. Avelinho Maria Coelho, ho moderador Dr. Alexandre Gentil Corte-Real de Araujo. ho tema diskusaun “Perspektiva Juridika konaba Funsionamentu Konstituisaun Republika: Forsa, Frakeza, Konstranjimentu no Alterasaun Eventual sira.”
Iha parte lorokraik, iha mos aprezentasaun husi Prezidente Bankada husi partidu politiku sira iha Parlamentu Nasionál, no moderadora Dra. Carmelita Caetano Moniz, ho tema: “Perspetiva politiku hodi hare liu ba iha impaktu KRDTL iha prosesu konstrusaun no konsolidasaun instituisaun Nasionál, konstrusaun identidade nasionál, no promosaun bem-estar no dezenvolvimentu ekonomiku no sosial.”
Seminariu ne’e, ensera husi Vise-Prezidente Parlamentu Nasionál, Alexandrino Afonso Nunes, ne’ebé haktuir mos katak “Timor-Leste nudar nasaun foun ne’ebe la’o dadauk iha prosesu konsolidasaun Estadu direitu demokratiku no dezenvolvimentu Nasional, tamba ne’e topiku ida ne’e nesesita duni Timor oan hotu-hotu nia kontribuisaun, liu-liu kontribusaun konsensual husi lider politiku sira.”
Marka prezensa iha semináriu ne’e, Membru Assembleia Konstituinte, Vise-Ministru Justisa Peprezentante membru Governu, Prezidente Tribunal Rekursu, Reprezentante Juiz, Prokurador no Defensor sira, Reprezentante akademiku, Relijiaun, peritu juridiku internasionál sira, sosiadade sivil no seluk tan.
