DILI (TOP) – Partidu FRETILIN sei hala’o konferensia nasionál hodi halo mudansa ba estrutura partidu ne’e rasik, maibé Sekretariu Jeral Partidu FRETILIN, Mari Bim Amude Alkatiri husu ba jeneral reformadu nu’udar mós segunda jerasaun Comite Central FRETILIN (CCF), Lere Anan Timur atu tenke kumpre ba estatudu partidu FRETILIN nian bainhira hakarak konkore ba iha konferensia nasionál ne’e.
“Kamarada Lere hatene ona estatutu halo nusa, nia mós iha ema ne'ebé nia konsulta, estatutu nafatin estatutu se taka dalan taka dalan, se loke dalan, loke dalan ha'u labele komete ida ne'e,” Alkatiri hateten ba jornalista sira hafoin hasoru malu ho Prezidente Repúblika, José Manuel Ramos-Horta iha Palásiu Prezidensial, Dili, Tersa 09 Agustu 2022.
Eis Primeiru-Ministru ne’e hatutan, nia hanesan mós jurista tanba ne’e bainhira halo revizaun ba estatutu ne'e ba kongresu mai fali la'ós ba agora, se la'e aban bainrua ema hotu-hotu tama mai halo revizaun mós hakarak sa'e.
Alkatiri dehan, sei lahalo komentariu Kona-ba konsolidasaun ne’ebé kamarada Lere hala’o ona durante ne’e iha munisípiu Likisa ne'e direitu Lere nian no nia la hatene saida mak Lere hatete iha Likisa no nia la taka dalan ba ema ida maibé estatutu ne'e estatutu.
Alkatiri ne’ebé lidera partidu FRETILIN sempre hasoru derrota politika iha Timor durante ne’e mós kontinua hatudu nia ambisaun hodi lakohi husik partidu ne’e ba ema seluk atu ka’er no lidera.
“Iha Kongresu FRETILIN ita boot sei avansa ka fó ba ema seluk Mari Alkatiri responde, atu fó ba se? Hatudu mai ha'u ema ida ne'ebé imi dehan ha'u bele fó, ha'u fó. Hatudu mai ha'u,” Alkatiri afirma hodi dehan se iha duni jerasaun foun nia bele toma inisiativa foun, no se pakote foun ruma mosu iha kongresu ne'e direitu tanba bele iha pakote segundu, terseiru, ka bele mós to'o pakote 20 ne'e ema nia direitu.
Oras ne'e mosu pakote lubuk ida iha CCF laran hodi kompete ho pakote Alkatiri no Lú Olo iha konferensia CCF iha Setembru tinan ida ne'e, maibé Alkatiri deklara ona sei la fó kargu ne'e ba kualker ema ida.
“Fo ha'u la fó, ha'u tenke iha sentidu responsabilidade,” katak Alkatiri.
