DILI – Prezidente Repúblika José Manuel Ramos-Horta sente preokupa tebes kona-bá númeru partisipasaun feto sira menus tebes hodi assume kargu xefia sira iha funsaun públiku durante ne’e.
PR Horta iha parte ida kontente tebes ho partisipasaun feto iha politika hanesan iha Parlamentu Nasionál hahu hatudu ona balansu tanba deputada sira hahu barak ona, maibé hare fali ba kargu xefia sira iha funsaun públiku sei kontinua domina husi mane sira.
Ho situasaun ne’e, nia rekomenda ba parte hotu atu halo mudansa ba situasaun ne’e hodi nune’e bele fó espasu barak liutan ba maluk feto sira bele assume kargu xefia sira hodi bele foti desijan iha lala’ok administrasaun públiku iha rai-laran.
"Iha governu, ministériu balun iha tempu governu uluk balun feto barak liu menus liu komforme, mas pior liu mak iha funsaun públika nivel diretor jeral, letra 7 ba feto ne'e la iha, dezde inisial menus," PR Horta ba jornalista sira hafoin partisipa iha seremonia aniversariu Ministériu Públiku ba tinan 20 iha salaun Ministériu Negósiu Estranjeiru no Kooperasaun iha Praia dos Coqueiros-Dili, Segunda 06 Juñu 2022.
Atu instituisaun públiku sira seluk bele hahu ona halo mudansa, tuir Horta katak, nia sei hahu ona fó espasu ba maluk feto sira hodi assume kargu xefi balun iha palásiu prezidensial durante nia mandatu daruak ne’e.
"Iha balun mas la sufisiente, ha'u pesoalmente nu'udar Prezidente Repúblika hakarak haree no tenki muda, hanesan ha'u tenta halo iha prezidensia repúblika,” nia promete.
