DILI (TOP) – Prezidente partidu FRETILIN Francisco Guterres Lú Olo fó parabéns ba prezidente eleitu José Manuel Ramos-Horta iha eleisaun ronde daruak.
"Ha’u simu rezultadu eleisaun segunda ronda ho laran hakmatek no ksolok tanba Povu rasik mak hili ninia Prezidente Repúblika," Lú Olo hateten liu husi konferensia ba imprensa iha Hotel Luz Clarita-Dili, Sesta 22 Abril 2022.
Lú Olo hatutan, rezultadu provizóriu husi eleisaun prezidensiál, ronda daruak, hatudu ona katak kandidatu José Manuel Ramos-Horta mak sei sai Prezidente Repúlika ba períodu 2022-2027. Ne’e mak vontade Povu nian, espresa liuhusi boletin-de-votu, direitu polítiku no demokrátiku ida ne’ebé garante husi Konstituisaun Repúblika.
Notisia relevante: Parabéns José Manuel Ramos -Horta eleitu ba prezidente RDTL
“Ha’u simu rezultadu eleisaun segunda ronda ho laran hakmatek no ksolok tanba Povu rasik mak hili ninia Prezidente Repúblika ba tinan lima tuir mai. Parabéns ba Dr José Ramos Horta, Prezidente eleitu ba mandatu 2022-2027 Ha’u fiar katak Ita-Boot sei koopera ho Parlamentu Nasional, VIII Governu Konstitusionál no Tribunal Rekursu atu hatutan konkista sira ne’ebé ita hetan ona iha tinan lima liubá,” afirma Lú Olo.
Lú Olo mós fó parabéns ba Povu Timor-Leste! Dala ida tan kompatriota sira, feto no mane, hatudu maturidade polítika tanba hatene hametin ambiente pás, trankilidade no estabilidade iha tempu kampaña no eleisaun.
Lú Olo dehan, ba kampaña primeira ronda no segunda ronda nia simu apoiu tomak no inkondisionál husi Partidu FRETILIN.
“Ha’u aproveita loron ohin hodi hato’o agradesimentu públiku ba Sekretáriu-Jeral FRETILIN, Dr Mari Alkatiri, no estrutura tomak iha nível nasionál to’o baze, ne’ebé servisu ho esforsu no dedikasaun tomak, atu garante ha’u nia vitória ba mandatu daruak, nu’udar Prezidente Repúblika. Ba kampaña segunda ronda ha’u haksolok tebes ho partisipasaun direta husi Prezidente partidu PLP, Jeneral Taur Matan Ruak no Konselleiru partidu KHUNTO, Bou Naimori, líderes husi partidu rua ne’ebé halo parte Maioria Parlamentar ida ne’ebé sustenta ohinloron VIII Governu Konstitusionál. Ba líderes no quadrus hotuhotu husi partidu rua ne’e, ne’ebé partisipa iha kampaña daruak ka hahú kedas iha kampaña dahuluk, ha’u hato’o ha’u-nia agradesimentu.”
“Ha’u agradese mós apoiu husi partidu “Os Verdes”ne’ebé deklara apoiu ba ha’u-nia kandidatura iha kedas primeira ronda. Agradese mós kuadrus partidu PUDD, Frente Mudansa, organizasoins hothotu Rezisténsia nian, Organizasoins Artes Marsiais no Rituais, no sidadaun no sidadaun ida-idak ne’ebé apoia ha’u-nia kandidatura no hala’o kampanã iha fatin-fatin, iha rai-laran no rai-li’ur.”
Lú Olo konsidera, biar akontese insidente balun bele sente orgullu nu’udar nasaun tanba konsege hala’o votasaun dala rua iha ambiente hakmatek, livre, demokrátiku no ho órden públika.
Agradese mós Tribunal Rekursu, órgauns eleitorais, STAE no CNE, fiskais no observadores nasionais no internasionais ho ida-idak ninia servisu. La haluhan agradese mós PNTL ne’ebé hanesan iha ronda uluk, hatene kumpre nia dever mantein ordem di’ak iha territóriu tomak iha kampaña daruak no eleisaun prezidensiál iha 19 abril 2022.
“Nu’udar kandidatu no nu’udar mós Prezidente Repúblika, ha’u apela ba Povu tomak atu simu rezultadu husi eleisaun prezidensiál 19 abril 2022 ho laran hakmatek no ksolok, atu ita hotu bele moris nafatin ho pás no establidade, dezenvolve ita-nia Rai doben ba hasa’e moris-di’ak ba ema hotu no hametin justisa sosiál”.
