DILI (TOP) — Festa demokrásia boot rua sei akontese tutuir malu. Ida maka eleisaun prezidensial ne’ebé sei akontese iha tinan 2022, no ida seluk maka eleisaun parlamentar ne’ebé sei akontese iha tinan 2023.
Lei eleitoral katak, sidadaun sira ne’ebé to’o ona tinan 18 iha ona direitu atu tuir votasaun, maibé tenke iha kartaun eleitoral.
Nune’e, Diretór Jerál Sekretáriadu Tékniku ba Administrasaun Eleitorál (STAE), Acilino Manuel Branco katak, provisoriamente STAE rejista ona eleitor sira hamutuk 839.320.
“Prosesu ne’e la’o hela, provizóriu ate fim do més de Março (tinan ne’e) ita iha 839.320 se la sala. Maibé, númeru ne’e provizóriu tanba neste momento resenseamentu no atualizasaun baze dadús rutina la’o hela iha eskritóriu STAE munisípiu sira,” diretor Acilino hateten ba The Oe-Kusi Post (TOP) bainhira partisipa iha seremonia lansamentu resensiamentu eleitoral iha edifísiu CNE, Kinta 01 Jullu 2021.
“Ho lansamentu ba resenseamentu eleitorál no atualizasaun baze dadús eleisaun prezidensial 2022 ne’e sei reforsa atendimentu iha nível postu administrativu sira no iha tempu badak sei halo mós atividade hanesan iha rai liur (estranjeiru) ba sidadaun sira ne’ebé iha Australia, Portugal, Kórea, Inglatera no fatin seluk tan,” Acilino afirma.
Nia fiar katak, hafoin remata halo serbisu koordenasaun ho Ministériu Negósiu Estranjeiru no Kooperasaun (MNEK), no se buat hotu la’o di’ak, númeru eleitor ne’e sei aumenta.
Nia hatutan, kuandu prosesu ne’e la’o ramata sei produs lista hodi taka iha munisípiu hodi fasilita eleitór sira bele halo reklamasaun karik mosu faillansu ruma kona-ba dadus.
“Fulan neen ne’’e ramata sei prodús lista provizóriu koloka iha suku sira para sidadaun idak-idak ba verifika no reklama ninia naran karik iha buat ruma sala no bele mós reklama ema seluk karik ema ne’e la elijivel reklama para depois STAE halo koreksaun tanba tuir lei antes loron 30 ba eleisaun ita fiksa no públika iha jórnal repúblika tuir lei haruka.”
Nia esplika, oras ne’e tékniku sira halo preparasaun hodi installa sentru votasaun ba de’it eleisaun prezidénsial, kona-ba eleisaun parlamentár seidauk tanba nia tempu seidauk to’o.
“Ba eleisaun parlamentár ninian ita sei iha tinan ida tan, ne’ebé ita nia konsentrasaun no fokus ne’e ba preparasaun eleisaun prezidente, ne’ebé preparasaun ita halo ida mós maka identifikasaun sentru votasaun sira.”
Nia dehan, STAE identifika ona sentru votasaun hamutuk 1200, estasaun votu hamutuk 500 iha teritóriu nasionál.
