AMBENO (TOP) - Diretór Rejionál ba Administrasaun no Rekursu Humanu, Domingos Punef hamutuk ho Serketariu Rejional Administrasaun no Finansa Rejiaun Administrasaun Espesial Oe-Kusi Ambeno (RAEOA), Salvador da Cruz inventa (troka) tiha fali loron Restasaun Independensia Timor-Leste ba fali Loron Proklamasaun Independensia.
Tuir sirkular ofisial ne’ebé The Oe-Kusi Post (TOP) asesu katak, iha loron 18 Maiu 2026, Diretór Rejionál ba Administrasaun no Rekursu Humanu, Domingos Punef husi Posto Nitibe hakerek karta sikular ida ho Número: 53/RAEOA-TL/SRAF-DRA e RH/V/2026 ne’e no hetan koñesimentu husi Serketariu Rejional Administrasaun no Finansa RAEOA, Salvador da Cruz hato’o ba Sekretariu Rejional ba Planeamentu no Dezenvolvimentu, Francisco Loka no Cc ba Prezidente Autoridade RAEOA, Régio Servante Romeia da Cruz Salu no Sekretaria Rejional ba Assuntu Sosial no Organizasaun Komunitaria, Merita Marques Lafo atu husu no informa ba funsionariu públiku hotu iha RAEOA tenke partisipa iha seremonia Loron Restaurasaun Independensia RDTL ba dala 24 iha loron 20 Maiu 2026, maibé inventa tiha fali ba loron Proklamasaun Independensia RDTL ba dala 24 iha loron 28 Novembru 2026.
Sirkular ne’e oras ne’e sai viral tiha ona iha plata forma media sosial no hetan reasaun kontra maka’as husi netizen sira ne’ebé sente lamentavel tebes, tanba nu’udar funsionariu públiku, tuir loloos tenke rekord didi’ak loron historiku sira iha Timor-Leste.
