AMBENO (TOP) - Ekipa Fiskalizasaun husi Konfederasaun Sindikatu Traballdor Timor-Leste hamutuk ho SEPFOPE konsege detekta no identifika sidadaun estranjeiru besik nain-30 oras ne’e hala’o hela serbisu ilegal iha Hotel Oeupu ne’ebé deskonfia atu nakfilak ba "Sentru Xamada Bosok-ten" (Scam Call Center) iha Rejiaun Administrativu Espesial Oe-Kusi Ambeno (RAEOA).
Tuir reportazen husi Radio Comunidade Atoni Lifau (RCAL) iha loron Sesta, 22 Agosto 2025 katak, sidadaun estranjeiru hirak ne’e mai husi Indonézia, Malazia no Nepal ne’ebé maioria tama mai rai-laran ho vistu turista, maibé realidade hatudu katak, oras ne’e sira hala’o hela serbisu iha Hotel Oeupu.
Ekipa fiskalizasaun ne’e mós deskobre traballador ilegal hirak ne’e hala’o serbisu desde fulan Maio to’o Agosto ona ho de’it vistu turista, la’os vistu serbisu.
António da Silva husi KSTL hateten ba RCAL katak, hafoin remata observa ekipa KSTL fó atensaun ba kompañia no SEFOPE atu toma medida ba trabalhador hirak ne’e, tanba kuaje nain-30 hala’o serbisu ho vistu turista, la’os vistu serbisu.
“Husu ba SEPFOPE atu toma atensaun ba traballador estranjeirus sira, tanba balun mai ho visa turista, maibé sira mai serbisu fali iha ne’e,” haktuir António da Silva husi KSTL ba RCAL.
Iha fatin hanesan, Diretor SEPFOPE RAEOA, Mario Muni Salu mós rekoñese katak, loos duni iha duni traballador husi rai-liur lubuk ida mak oras ne’e hala’o hela serbisu iha Hotel Oeupu ho vistu turista, la’os ho vistu serbisu nian.
Jornalista RCAL iha RAEOA halo kedas esforsu hodi konfirma assuntu ne’e ba iha Polisia Imigrasaun RAEOA nian, maibé seidauk hetan resposta, tanba sei hein autorizasaun husi Imigrasaun Nasionál mak sira foin hato’o buat ruma kona-ba kestaun ne’e.
