AMBENO (TOP) – Governu sentral ho Organizasaun Mundial ba Saúde (OMS) desde tinan kotuk to’o agora halo esforsu maka’as tebes hodi husu no konvense sidadaun hotu iha rai-laran tenke simu vasina Covid-19 hodi hasa’e imunidade kontra moras a’at ne’e, maibé esforsu ne’e kontraria ho politika kombate Covid-19, no politika vasinasaun iha Rejiaun Administrativu Espesial Oe-Kusi Ambeno (RAEOA), tanba responsavel ba Komunikasaun Interna no Externa Covid-19 iha Gabinete Prezidente Autoridade RAEOA, Marcos Seo subar fali vasina Covid-19 SINOVAC nian iha Oe-Kusi Ambeno.
“Dadersan de’it nia mai ona iha ne’e hodi dehan tenke xavi metin tiha freezer ne’e atu labele foti vasina SINOVAC. Nia intensaun ne’e atu izola de’it Agustinho Caet hodi labele simu SINOVAC iha Oe-Kusi Ambeno maske ohin nia loron nu’udar loron daruak nian atu kompleta nia vasinasaun ne’e,” hatete pessoal saúde ida ba The Oe-Kusi Post (TOP) iha Sentru Saúde Pante Macassar, Oe-Kusi Ambeno, Segunda 19 Setembru 2021.
Pessoal saúde ne’e hatutan, Marcos Seo ne’e maske la tama iha ekipa Covid-19 nian, maibé uja nia poder no abuja nia poder ne’e hodi dadersan de’it mai hakilar iha sentru saúde rejional katak, loron ohin tenke xavi metin freezer vasina Covid-19 hodi labele vasina ba Agustinho Caet.
“Maibé, ami la preokupa ba nia intervensaun ne’e, tanba vasina ne’e importante ba sidadaun sira hodi hetan asesu. Nune’e, ami konsege hasai duni vasina doze hodi atende Agustinho Caet iha Segunda ne’e kedas,” esplika pessoal saúde ne’e.
Pessoal saúde ne’e esplika, saida maka sira halo ne’e la kontra buat ida.
“Tanba ne’e maka maske Marcos Seo mai halo intervensaun politika mós ami la preokupa ida, tanba vasina ne’e importante tebes hodi hasa’e ita nia sidadaun sira nia imunidade hodi satan Covid-19 ne’e,” nia hatutan.
Tanba pessoal saúde sira mantein sira nia serbisu no atendimentu profisional ba ema hotu, maka ikus mai Sekretariu Rejional ba assuntu Saúde Manuel da Costa ikus mai foti desijaun hodi ezona tiha pessoal saúde ida ne’ebé koordena kona-ba programa vasinasaun iha Oe-Kusi Ambeno.
Entretantu, bainhira TOP konfirma assuntu ne’e ba Marcos Seo, via kontaktu telemovél, no jornalista TOP foin hahu halo introdusaun katak ne’e jornalista husi The Oe-Kusi Post (TOP), Seo direitamente hamate kedas nia telefone, maibé Jornalista TOP kontinua halo esforsu hodi konfirma assuntu ne’e, no haruka tan lista pergunta sira ba Seo nia número WhatsApp Timor-Telecom no TELEMOR, Seo nafatin lakohi fó esplikasaun ba pergunta sira, maibé hatan fali ho lia-fuan insulta ba jornalista TOP ne’ebé hato’o pergunta ne’e ba nia.
“Boatarde mos ba Jornalista TOP Maufehuk, maubeik ten hanesan o maka esplika no perguntas la hun la dikin ne’e bah an tiha asu no fahi nia te’e dois maka husu fali hau. Obrigadu,” resposta Seo via nia número WhatsApp tantu iha númeru TT no TELEMOR ba TOP foin lalais.
Seo nia respsosta ne’e hatudu momos nia inkapasidade kona-ba politika kombate Covid-19 iha rai-laran, liliu iha Oe-Kusi Ambeno.
Dadus kona-ba ema ne’ebé simu ona vasina iha fulan Agostu liuba foin maka to’o ema nain 21000 (48%), tanba maioria populasaun sei kontinua tauk simu vasina ne’e ho rajaun bele hetan fali moras foun seluk. Dadus ne’e sei do’ok tebes husi metas ne’ebé autoridade RAEOA hakarak atinje.
Dadus husi Organizasaun Mundial ba Saúde (OMS) katak, to’o iha loron 14 Setembru 2021, vasina doze hamutuk 643,324 maka administra tiha ona.
