AMBENO (TOP) – Eis komandante em xefe das FALINTIL atual Prezidente partidu CNRT, Kay Rala Xanana Gusmão hato’o mensajen kondolênsia ba saudozu, Má-Hunu Bulerek Karatayno.
“Ohin, ha’u lakon tan ha’u nia Alin ida! Má-Hunu Bulerek Karatayno, hamutuk ho ha’u, maka Sobreviventes husi Comité Central FRETILIN, husi kedas tinan 1980, ne’ebé Reorganiza fali Resistênsia Armada, iha I Konferênsia Nasional, nebé hala’o iha Marsu tinan 1981, iha Laline,” Xanana hato’o mensajen ne’e ba jornalista sira iha Oe-Bau, Oe-Kusi Ambeno, Sesta, 24 Setembru 2021.
Kay Rala Xanana Gusmão dudu hela saudozu Má-Hunu./Net.
Xanana hatutan, iha ona konferênsia ne’e, maka sira na’in-rua orienta kuadru sira ne’ebé partisipa iha ne’ebá, hodi eleje fali Membru Komité Sentral FRETILIN (CCF) foun, hanesan Nino Konis Santana, Bere Malay Laka no selu-seluk tan, ne’ebé mate iha funu-laran no balun iha kedas fulan Setembru tinan 1981, iha Operasi Kikis, ne’ebé inimigu hala’o iha Rejiaun Sentral.
Xanana dehan, Lere Anan Timur mós eleitu hanesan membro CCF no sai Komisáriu Polítiku iha Rejiaun Haksolok/Fronteira Sul. Iha ona 1984, mak sai husi kuadru polítiku no assume kargu hanesan Komandante.
“Ohin loron, membros CCF husi jerasaun 1981, mak hela de’it ona Komandante Lere. Husi fali jerasaun CCF 1975, ne’ebé la rende no sei moris, maka ami na’in rua Má-Hunu ho ha’u. Maibé, ohin, Má-Hunu liu tiha ona,” Xanana konta.
Jeneral Taur Matan Ruak atual Primeiru-Ministru, Prezidente Partidu FRETILIN atual Prezidente Repúblika, Francisco Guterres Lú Olo hamutuk ho nia Sekretariu Jeral FRETILIN, Mari Alkatiri la’os kategoria ba membru CCF 1975 nian.
Xanana haktuir, iha 1999 nia kompanheiru Má-Hunu hetan tiha stroke no terus, ho moras ida ne’e, to’o ohin nia husik tiha mundu.
“Nudar Presidente Partido CNRT, hodi Partido tomak, kuadrus no militante sira nia naran, ha’u hakarak presta ami-nia honra ba Fundador ida Partido CNRT nian. Nudar mós Presidente Partido CNRT no nudar pessoal, ha’u hato’o sentidu pêzame ba Kompanheira Teresinha Viegas no ba família tomak husi Kompanheiru Má-Hunu Bulerek Karatayano nian”.
Maromak simu hela nia iha ninia kadunan santo, hodi husu mós atu Má-Hunu bele tau matan no akompanha ita hotu iha situasaun difísil ne’e.
José António Gomes da Costa ho naran funu nian maka Má-Huno Bulerek Karathayano iis-kotu iha Hospitál Nasionál Guido Valadares (HNGV) iha loron Sesta oras tuku 5:30 hodi husik hela nia familia tomak, liliu povu Timor-Leste.
Saudozu Má-Hunu nu'udar mós fundador ida ba partidu CNRT iha tinan 2007./Net.
Author:Raimundos OkiWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
