Tribunal Ambeno hasai mandadu kapturasaun ba Padre João Suban

AMBENO (TOP) – Prosesu julgamentu ba kazu pedofilia ne’ebé deskonfia komete husi eis padre Amerikanu iha uma mahon Topu-Honis, Oe-Kusi Ambeno hahu fali ona iha loron Segunda 20 Setembru 2021 hodi rona sasin husi João Suban Gapun, SVD, maibé la komparese iha Tribunal Ambeno.

Sasin João Suban Gapun nu’udar padre regional superior SVD nian iha Timor-Leste ne’ebé sai nu’udar mós sasin importante ba kazu krime pedofilia no pornografia infantile ne’ebé deskonfia komete husi eis padre SVD Amerikanu ida iha uma mahon Topu-Honis, Kutet, Oe-Kusi Ambeno. Nia nu'udar sasin husi Ministériu Públiku nian.

Tuir advogadu Miguel Faria katak, tuir loloos kazu Topu-Honis ne’e rona ona sasin padre regional superior SVD nian iha Timor-Leste, Sasin João Suban Gapun, SVD iha Segunda foin lalais.

“Maibé, nia la komparese iha Tribunal, nia fó nia deklarasaun eskrita de’it, maibé Tribunal la halo apresiasaun ba ida ne’e. Tribunal nia intendimentu katak, sasin ne’e tenke fó nia depoimentu oral iha Tribunal. Ida ne’e maka nia la komparase iha Segunda liuba, Tribunal hasai mandadu kapturasaun ba amu ne’e obriga nia atu Sesta ohin mai iha Oe-Kusi Ambeno hodi fó nia depoimentu ba kazu Topu-Honis nian,” hateten advogadu Miguel Faria ba The Oe-Kusi Post (TOP) iha edifisiu Tribunal Distrital Oe-Kusi Ambeno nia oin, Sesta 24 Setembru 2021.

Tuir informasaun balun ne'ebé TOP asesu, membru Polisia Nasionál Timor-Leste (PNTL) balun hafoin simu mandadu kapturasaun husi Tribunal Distrital Oe-Kusi Ambeno, sira ba entrega de'it hanesan karta notifikasaun ba Padre João Suban Gapun, SVD nia hela fatin iha konventu SVD, Kuluhun, Dili, maibé hafoin ida ne'e parte advogadu telefone fali ba ofisial justisa Tribunal Ambeno katak, ne'e la'os karta notifikasaun, maibé mandadu kapturasaun. Nune'e Polisia Nasionál Investigasaun Kriminal (PNSIK) maka ba ka'er fali padre ne'e iha Kuluhun Dili foin lalais. 

    

 

 

 

    

 

Raimundos Oki
Author: Raimundos OkiWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Xefe Redasaun & Editor

PUBLISIDADE

Online Counter