AMBENO (TOP) – Eis Komandante em Xefe das FALINTIL, Kay Rala Xanana Gusmão ho nia ekipa sai husi Dili iha loron Sesta 17 Setembru 2021 ba Oe-Kusi Ambeno hodi partisipa prosesu julgamentu ba kazu pedofilia ne’ebé deskonfia involve eis misionariu Amerikanu iha Oe-Kusi Ambeno.
Xanana ho nia ekipa to’o iha portu Iwao Kitahara Mahata iha Sabádu 18 Setembru 2021 oras tuku 1 kalan boot.
The Oe-Kusi Post (TOP) observa, bainhira Xanana ho nia ekipa to’o iha portu ne’e, simu husi Marcos Seo nu’udar responsavel ba Komunikasaun Interna no Externa Covid-19 iha Gabinete Prezidente Autoridade RAEOA ho nia ekipa sira.
Marcos Seo./Net.
Xanana ho nia ekipa kumpri tebes protokolu Covid-19 hodi entrega rezultadu Swab Nose Test ne’ebé rezultadu hatudu negativu ba Marcos Seo, maibé Seo sei sisi nafatin rezultadu Swab Nose Test husi Agustinho Caet nian maske Xanana esplika ona ba nia.
Liu tiha ida ne’e, Xanana ho nia ekipa hakat husi portu Mahata ba sira nia hela fatin iha Oe-Bau, Oe-Kusi Ambeno hodi deskansa, no Marcos Seo ho Komandante Polisia RAEOA, Superintendente Xefe, Mateus Mendes Asunção ho nia membru sira akompaña ekipa ne’e ba to’o Oe-Bau.
To’o Oe-Bau, komesa mosu ona tentasaun husi Marcos Seo atu obriga Agustinho Caet atu ba tama kuarentena ho rajaun Caet foin maka simu vasina dahuluk, maibé Caet prefere auto-kuarentena hodi hein prosesu kompleta nia vasina daruak nian.
Kalan ne’e Seo lakonsege ezekuta nia misaun ne’e. Nune’e, iha fali tempu meudia, Seo hamutuk ho ekipa Covid-19 nain-rua kontinua hakat nafatin ba Oe-Bau ho intensaun atu obriga Caet tenke sai husi auto-kuarentena hodi ba hela fali iha kuarentena bai-bain.
Iha tempu ne’eba, Seo hamrik hein de’it iha liur, no médiku ida maka tama ba Caet nia fatin hodi esplika ba nia katak, ne’e orientasaun husi ema boot sira iha RAEOA atu evakua nia sai husi auto-kuarentena ba fali kuarentena baibain. Maibé, Caet nafatin reziste hodi hela nafatin de’it iha auto-kuarentena.
Prezidente Autoridade ba RAEOA, Arsenio Paixão Bano. Foto Media ZEESM.
“Sira obriga loos Caet atu ba hela fali iha kuarentena baibain halo Maun Boot Xanana rona maka hakilar ekipa Covid-19 ne’e husik Caet,” esplika sasin ida ba TOP iha Oe-Kusi Ambeno, Segunda 20 Setembru 2021.
“Marcos Seo nia hahalok ne’e hanesan asaltu ba Xanana, tanba iha portu ne’e Maun Boot esplika ona ba nia, maibé nia la komprende nafatin hodi mai fali tan iha oras meudia nian, maibé mai nia hamrik de’it iha liur ne’eba depois haruka fali médiku ida maka tama ko’alia ho Caet,” sasin ne’e afirma.
Sasin ne’e hatutan, hahalok no prezensa Marcos Seo iha Xanana nia fatin ne’e, tanba deskonfia hetan orientasaun husi Prezidente Autoridade ba Rejiaun Administrativu Espesial Oe-Kusi Ambeno (RAEOA), Arsenio Paixão Bano.
“Ha’u deskonfia Arsenio Bano maka orienta Marcos Seo hodi halo asaltu ba Xanana nia hela fatin ne’e. Ha’u konsidera hahalok ne’e nu’udar hahalok asaltu ida, tanba maske hetan ona esplikasaun klaru mós Marcos Seo ne’e sei mai nafatin,” esplika sasin ne’e.
TOP tenta konfirma assuntu ne’e ba Responsavel ba Komunikasaun Interna no Externa Covid-19 iha Gabinete Prezidente Autoridade RAEOA, Marcos Seo rejeita total akuzasaun ne’e.
“Ha’u nunka ba asaltu Xanana iha nia hela fatin,” hateten Seo via kontaktu telemovél ba TOP Segunda, 20 Setembru 2021 horas tuku 10:20 kalan.
Bano (karuk) hamutuk ho Seo (loos). Foto Media ZEESM.
Entretantu, Prezidente Autoridade ba RAEOA, Arsenio Paixão Bano hateten, oras ne’e nia seidauk bele fó komentariu, tanba sei okupadu hela ho assuntu familia nian iha Oe-Kusi Ambeno, maibé promete ona sei fó esplikasaun klean kona-ba assuntu ne’e iha loron Tersa 21 Setembru 2021.
TOP mós haruka lista pergunta balun ba Prezidente Autoridade nia número WhatsApp, no sinal hatudu nia le’e tiha ona mós seidauk hatan ba pergunta sira ne’e.
Author: The Oekusi PostWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
www.OeKusiPost.com nu’udar plataforma media online iha Oe-Kusi Ambeno, Timor-Leste ne’ebé aprezenta notísia iha área oioin iha teritóriu nasionál.
Rua. Numbei, Oe-Kusi Ambeno
Mobile: +670 7723 4114
Email: info (at) OeKusiPost.com
