AI-LOK (TOP) – Promesa governu atual hodi fornese nesesidade báziku ba sidadaun sira iha rai-laran to’o oras ne’e “seidauk realiza” inklui subsidiu osan $100 ba sidadaun sira ne’ebé kada fulan rendimentu menus husi $500, maibé eis komandante em xefe atual Prezidente Partidu CNRT, Kay Rala Xanana Gusmão ho nain ba kompañia Lotaria Badfor Unipesoal Lda, Key Savier ajuda ona familia kbi’it la’ek hamutuk 300 iha suku lubuk ida ne’ebé partense ba postu Cristo Rei, munisipiu Dili.
Abitante kbiit laek 300 ne’ebé simu sasán nesidade baziku hanesan foos saka 300 kompleta ho mina no ikan frestu ba aldeia Ketutu, uma kain 130, aldeia Marlboro 70, aldeia Kulau 50 no Aldeia Karau Maten hamutuk 50. Prosesu fahe karidade ne’e, fahe direita husi Kay Xanana Gusmão, no Key Xavier akompaña husi autoridade suku no hetan seguransa husi Ofisiál Polisia Suku (OPS).
Komunidade kbiit laek, Joana José Mendonça konsidera asaun karidade ne’e pelu-menus bele hakman netik sira durante periodu Estadu emerjénsia ne’e.
“Ami kontente, tanba coronavirus halo ami tuur triste iha uma la sai, lori sasán ba merkadu ema la sosa, ohin ami kontente Avó Xanana no ami nia alin Key fó apoiu mai ami ne’e hanesan grasa ida,” hatete Joana Mendonça ba jornalista sira iha Ketutu, Suku Ai-Lok, postu Cristo Rei, munisipiu Dili.
Nune’e mós Filomena da Silva agradese tebes ba apoiu nesesidade báziku, tanba durante Estadu emerjénsia sira hasoru obstaklu barak, hanesan lori produtu lokál sira ba faan iha merkadu, maibé polisia bandu labele faan sasán.
“Corona ne’e halo ami susar tebes, lori modo tahan ba faan mós ema la sosa, ita osan araska atu sosa hahán, maibé ho prezensa Avó Breok (Xanana), halo ami kontente tebe-tebes bele simu netik foos atu ajuda ami,” nia kontente no agradese ba apoiu ne’e.
Filomena hatutan, durante ne’e sira rasik hein apoiu husi Governu Timor-Leste atu fó subsidiu $100 ba kada familia, maibé to’o ohin promesa governu nian ba osan ne’e seidauk to’o sira nia liman laran.
Entretantu, xefe aldeia Ketutu, Agostino Pereira, no xefe suku Ai-Lok, Mário do Rego hato’o agradese ba domin ne’ebé oferese husi Kay Rala Xanana Gusmão no Key Xavier hodi apoiu kbi’it la’ek durante temupu Estadu emerjénsia ne’e.
“Apoiu ne’e fó kedas ba kbiit laek ne’ebé ami identifika ona maka merese duni atu simu apoiu ne’e,” nia hatete.
Nune’e mós, xefe aldeia Marlboro, Aires do Rego mós apresia apoiu ne’e fó benefisiu direita ba abitante ne’ebé tama kategoria kbi’it la’ek.
Nain ba kompañia Lotaria Badfor, Key Xavier dehan apoiu ne’ebé nia ho Kay Rala Xanana Gusmão oferese fó prioridade ba kb’iit laek sira ne’ebé hasoru susar iha periodu Estadu emerjensia ne’e.
Nia dehan, apoiu ne’e ki’ik, maibé hanesan Timoroan ida hakarak fahe ninia domin ba Timoroan ne’ebé susar no moris iha mukit durante ne’e situasaun emerjénsia ne’e.
Kay Rala Xanana Gusmão katak, apoiu ne’e oferese husi emprezariu Timoroan Key hodi hatudu solidaridade no domin ba povu iha tempu situasaun emerjénsia ne’e.
“Ha’u mai akompaña de’it ita nia imi nia maun alin Key fó ajuda la barak, maibé importante nia mai mai hatudu nia domin ho apoiu ne’e imi bele han netik ho modo tahan ruma,” Xanana esplika.
Xanana mós kontinua husu ba populasaun sira iha tempu Estadu Emerjensia kontinua kuidadu aan husi ameasa COVID-19 too Governu deklara ona Timor-Leste livre foin povu bele hala’o fila fali atividade negosiu no atividade seluk tan.
