Oekusipost.com Dili – Durasaun Estadu emerjénsia sura hahu husi aprovasaun dekretu governu ba medida sira Estadu emerjénsia ne’ebé aprova iha loron Sabádu, 28 Marsu 2020 to’o ohin foin mak tama loron tolu, maibé afeta ona stock modo iha merkadu sira iha Dili laran hahu menus ba dadauk.
Merkadu Taibesi nu'udar merkadu sentral iha kapital Dili, ne’e sai mamuk tiha.
Observasaun Oe-Kusi Post iha merkadu ne’e iha loron Segunda 30 Marsu 2020 katak, merkadu Taibesi ne’ebé durane ne’e la’o ses malu la di’ak, ohin loron sai fuik tiha, tanba movimentu negosiante no sosa nain sira laiha.
Negosiante Bua Maran, Januario Gomes katak, desde informasaun kona-bá moras Novel Coronavirus Disease 2019 (CorVid-19) mosu no aumenta tan Estadu emerjénsia mak halo ema tauk no pániku hodi mai merkadu.
“Agora hare ema laiha. Iha munisipiu sira mós ha’u telefone ba katak lalika mai ona, tanba mai polisia preende kedas iha dalan,” hatete Gomes ba Oe-Kusi Post iha merkadu Taibesi, Dili Segunda 30 Marsu 2020.
Nia hatutan, situasaun ne’e afeta tebes ba nia atividade negósiu, tanba durante ne’e nia atividade prinsipal mak fa’an bua iha merkadu Taibesi hodi sustenta nesesidade uma laran lorloron.
Iha fatin hanesan, vendedora iha merkadu Taibesi, Marina Carvalho da Costa hatete, merkadu Taibesi agora daudaun laiha ona modo tanba ema mak la lori mai ona desde horseik kedan.
"Ami hein modo tahan dezde ohin dader to'o agora, maibe ema la lori mai ida. Ita boot sira bele hare modo laiha," nia hatete.
Tuir nia katak, ema la lori modo tahan ba merkadu Taibesi ne'e problema boot ba vendedor sira, maibé tanba virus corona, no Estadu emerjénsia ne'e mak halo ema tauk.
Nia hatutan, ho situasaun ida ne'e, vendedor sira sei la hetan rendimentu husi sira nia atividade negosiu durante iha fulan ida nia laran.
“Agora Estadu bandu tan ona hanesan ne’e, susar tebes mai mai, tanba sei lahetan osan durante fulan ida nia laran. Ida ne’e dezastre boot mai ami, tanba ami nia moris fa’an modo ne’e,” nia esplika. (ekipa)
