Oekusipost.com SALELE – Membru Unidade Patrulla Fronteira (UPF) hamutuk nain 12 iha kompañia Bravo Salele, Kovalima hetan ona promosaun diviza ba sarjentu no ajente.
Promosaun diviza ne’e bazeia ba despaixu ida husi Komandante Jeral PNTL ho númeru 139/CG-PNTL/III/2020. Seremónia promosaun ne’e akontese iha loron Sábadu Sesta 3 Abril 2020 iha Aldeia Kasabauk, Suku Salele, Postu Administrativu Suai, Munisípiu Covalima.
Membru UPF sira ne’ebé hetan promosaun diviza mak husi sarzentu ba primeiru sarzentu na’in 2, ajente prinsipal ba ajente xefe na’in 2, ajente ba ajente prinsipal hamutuk nain 8.
Komandante UPF, Superintendente Xefe João dos Reis Belo hateten, diviza ne’e tau ho dignu tuir koridor, disiplina ne’ebé iha, tanba lori sakrifisiu tinan 6 nia laran mak foin hetan promosaun ne’e.
“Durante tinan barak nia laran sira hala’o serbisu laiha fallansu,” hatete komandante João Belo.
Nia hatutan, promosaun diviza ne’e nu’udar responsabilidade boot ida ba membru sira hodi kontinua serbisu hametin fronteira rai-maran atu ema labele tama-sai illegal hodi bele kombate no prevene pandemia COVID-19.
Iha fatin hanesan Komandante Kompañia Bravo Suai, Inspetór João Baptista Ferreira hato’o agradese barak ba governu ne’ebé tau matan ba membru UPF sira ne’e liu husi promove sira nia diziva.
“Ida ne’e nu’udar motivasaun boot id aba sira hodi kontinua hala’o serbisu ho disiplina no responsabilidade,” nia hatete.
