TOP - Prezidente Estadus Unidus , Donald Trump, hatete katak sesarfogu "kompletu no totál" entre Israel no Iraun sei tama iha vigór ho hanoin atu hakotu konflitu loron 12 entre nasaun rua ne'e, momentu balun hafoin parte rua ameasa atu lansa tan atake foun sira.
Enkuantu ofisiál iranianu ida konfirma katak Teeraun konkorda ona ho sesarfogu, seidauk iha komentáriu imediatu hosi Israel.
Ofisiál aas ida hosi White House hatete katak Israel konkorda ona bainhira Iraun la lansa tan atake sira no katak Trump maka media akordu ne'e iha konvokatóriu ida ho primeiru-ministru israelita, Benjamin Netanyahu.
Trump parese sujere katak Israel no Iraun sei iha tempu balun atu kompleta misaun ruma ne'ebé maka hala'o hela, iha pontu ne'ebé maka sesar-fogu sei hahú iha prosesu ida ne'ebé maka hala'o hela.
"Ho asumsaun katak buat hotu funsiona hanesan nia tenke, ne'ebé sei funsiona, ha'u hakarak kongratula Nasaun rua, Israel no Iraun, tanba iha Estamina, Korajen, no Intelijénsia atu hakotu, saida maka tenke hanaran, 'FUNU LORON 12'," nia hakerek iha nia sítiu Truth Social.
Primeiru-ministru Qatar nian, Xei Mohammed bin Abdulrahman Al Thani asegura ona akordu Teeraun nian durante konvokatóriu ida ho responsável iranianu sira, hatete hosi responsável ida ne'ebé informadu kona-ba negosiasaun sira iha loron-tersa ne'e ba ajénsia Reuters.
Trump hatete ba emir Qatar nian katak Israel konkorda ona ho sesárfogu, haktuir hosi responsável. Nein misaun Iraun nian iha ONU no mós embaixada Israel nian iha Washington la hatán kedas ba pedidu ketak sira ba komentáriu hosi Reuters.
Oras balun antes, ofisiál israelita na'in tolu fó sinál katak Israel buka atu hakotu nia kampaña iha Iraun iha tempu badak no pasa ona mensajen ba Estadus Unidus.
Netanyahu hatete ona ba ministru sira Governu nian ne'ebé nia diskusaun sira hotu iha madrugada iha loron-tersa atu labele ko'alia iha públiku, fó sai hosi televizaun Israel nian, Channel 12.
Futuru petróleu brutu norte-amerikanu nian tun iha inísiu oras komérsiu aziátiku nian iha loron-tersa ne'e ba sira nia nível ki'ik liu iha semana ida liubá hafoin Trump hatete katak akordu ona sesarfogu ida, hodi hamenus preokupasaun sira kona-ba interupsaun fornesimentu nian iha rejiaun.
FIN BA LUTA?
Parese seidauk iha kalma iha rejiaun ne'e.
Militár israelita fó sai alerta evakuasaun rua iha menus oras rua ba rezidente sira hosi zona sira iha kapitál iranianu Teeraun, ida iha loron-segunda kalan no ida iha madrugada loron-tersa. Rádiu hosi Ezérsitu israelita fó sai iha madrugada loron-tersa katak alarme sira ativa iha zona súl Golan Heights nian tanba tauk hosi intruzaun hosi aviaun ostil sira.
Iha loron-segunda ne'e, Trump hatete katak sei enkoraja Israel atu kontinua ba dame hafoin rejeita atake Iraun nian hasoru baze aérea norte-amerikanu ida ne'ebé la kauza kanek ruma no agradese ba Teeraun ba avizu antesipadu kona-ba atake sira.
Atake Iraun nian akontese hafoin bombardeiru norte-amerikanu sira soe bunker-busters ho todan 30,000 libra iha instalasaun nukleár subterránea Iraun nian iha findesemana, hodi hamutuk ho funu aéreu Israel nian hasoru Iraun iha konflitu ida ne'ebé tama ona iha loron 12.
Parte boot hosi populasaun Teeraun nian ho millaun 10 halai hafoin loron barak hosi bombardeamentu sira. Administrasaun Trump nian defende katak nia objetivu maka de'it atu estraga programa nukleár Iraun nian, la'ós atu loke funu ida ne'ebé luan liu. Maibé iha post ida iha mídia sosiál iha Domingu, Trump ko'alia kona-ba hamonu ukun-na'in klerikal sira ne'ebé maka sai hanesan inimigu prinsipál sira Washington nian iha Médiu Oriente dezde Revolusaun Islámika Iraun nian iha tinan 1979.
Israel, maski nune'e, fó sai ona ho klaru katak nia atake sira hasoru prizaun Evin - prizaun notóriu ida ba prizioneiru polítiku sira - no alvu sira seluk iha Teeraun ho intensaun atu kona aparellu governante iranianu ho luan, no nia abilidade atu sustenta podér.
Iha parte seluk, Sekretáriu-Jerál ONU, António Guterres sente alarmadu tebes ho eskalasaun konflitu nian iha Médiu Oriente.
Desde inísiu krize nian, Sekretáriu-Jerál kondena beibeik eskalasaun militár ruma iha konflitu ida-ne'e, inklui atake ohin nian hosi Iraun iha teritóriu Qatar nian. Nia repete liután nia apelu ba parte hotu-hotu atu para funu.
Sekretáriu-Jerál husu ba Estadu-membru hotu-hotu atu kaer metin sira-nia obrigasaun tuir Karta ONU nian no regra sira seluk hosi direitu internasionál.
